ქალაქ ზუგდიდის მუნიციპალიტეტის ცენტრალურ ბიბლიოთეკაში ჟურნალისტის ია ანთაძის წიგნის პრეზენტაცია გაიმართა. ეს ავტორის პირველი ნამუშევარია, რომელსაც „პირველად იყო ლაქა“ ჰქვია. წიგნი ჟურნალისტის მიერ წლების განმავლობაში შექმნილი წერილებისა და ბლოგების კრებულია, რომელსაც ავტორი რადიო თავისუფლების ვებ-გვერდზე აქვეყნებდა. წიგნში საუბარია 1990 -იანი წლების საქართველოზე, 9 აპრილის ტრაგედიაზე, ედუარდ შევარდნაძის და მიხეილ სააკაშვილის პოლიტიკურ მოღვაწეობაზე, პოლიტიკურ შეფასებებზე. წიგნი ბიძინა ივანიშვილის პოლიტიკაში მოსვლით სრულდება და ავტორი ყოფილი პრემიერ-მინისტრის პერსპექტივებს აფასებს. ია ანთაძის პირველი წიგნი გამომცემლობა არტანუჯმა დაბეჭდა. „ მე ვარ ძალიან მადლობელი გამომცემლობა არტანუჯის, რომელმაც თავი მოუყარა ამ ყველაფერს და გამოსცა წიგნად. ჩემთვის არის უდიდესი პატივი, რომ მე დღეს მქვია წიგნის ავტორი. ბოლომდე ვერც კი გამითავისებია, რომ ეს არის დიდი პასუხისმგებლობა და ალბათ ნელ-ნელა მივეჩვევი ამ ახალ სტატუსს. მინდა, რომ ეს წიგნი იყოს სასარგებლო ახალგაზრდებისთვის, ჟურნალისტებისთვის და საზოგადოების იმ ნაწილისთვის, რომელიც არის სიღრმისეული ჟურნალისტიკით დაინტერესებული“ – განაცხადა ჟურნალისტმა და წიგნის ავტორმა ია ანთაძემ.
როდესაც გამომცემლობა „არტანუჯმა“ ჩემი სტატიების და ბლოგების წიგნად გამოცემა შემომთავაზა, ჯერ დავიბენი; შემდეგ ვიუარე და გავჯიუტდი; ბოლოს ჩავუჯექი და თავიდან ბოლომდე გადავიკითხე, რაც კი ოდესმე სტატია და ბლოგი დამიწერია. გზადაგზა თითქოს დავინახე წიგნი, რომელიც ცოტ-ცოტას გვიამბობს ჩვენი საერთო სამშობლოს წარსულზე, აწმყოსა და, იმედი მაქვს, მომავალზე; გვიამბობს იმაზე, რაც, ჩემი აზრით, არსებითია; იმაზე, რაც აკავშირებს ლიტერატურას და პოლიტიკას, შემოქმედებით და კრიტიკულ აზროვნებას, შემეცნებას და ქმედებას, აღმოსავლეთს და დასავლეთს, საქართველოს და დანარჩენ სამყაროს. დიდი მადლობა ამ წიგნის ყველა მეგობარს!“ – აღნიშნავს ია ანთაძე წიგნის წინასიტყვაობაში.
ქალაქ ზუგდიდის მუნიციპალიტეტის ცენტრალურ ბიბლიოთეკაში წიგნის „პირველად იყო ლაქა“ ბიბლიოთეკის თანამშრომლები, საზოგადოების, არასამთავრობო ორგანიზაციებისა და მედიის წარმომადგენლები დაესწრნენ.