დღეს პარლამენტი რიგგარეშე სხდომას გამართავს. სხდომა 13:00 საათზე დაიწყება. დეპუტატები იმსჯელებენ საქართველოს კონსტიტუციაში ცვლილებების შეტანის თაობაზე, აჭარის ავტონომიური რესპუბლიკის კონსტიტუციური კანონპროექტის შესახებ და საქართველოს იუსტიციის უმაღლესი საბჭოს წევრების არჩევის საკითხებზე.
გადაწყვეტილება რიგგარეშე სხდომის მოწვევის შესახებ პარლამენტის ბიურომ მიიღო, მიუხედავად იმისა, რომ გუშინ საქართველოს პრეზიდენტმა უარით უპასუხა პარლამენტის ამ მოთხვნას იმ მოსაზრებით, რომ საკონსტიტუციო ცვლილებების კანონპროექტის ის ვარიანტი, რომლის განხილვაც დღეს იგეგმება, მიუღებელია მისთვის, როგორც მმართველ გუნდს მორგებული და საზოგადოებასთან შეუთანხმებელი.
როგორც საქართველოს პარლამენტის თავმჯდომარემ, ირაკლი კობახიძემ გუშინ ბიუროს სხდომაზე განაცხადა, კონსტიტუციისა და რეგლამენტის თანახმად, პარლამენტი უფლებამოსილია სხდომა პრეზიდენტის თანხმობის გარეშეც ჩაატაროს.
“პრეზიდენტს წარვუდგინეთ წარდგინება რიგგარეშე სხდომის მოწვევის თაობაზე, რაზეც პარლამენტს უარი ეთქვა პრეზიდენტის მხრიდან. კონსტიტუციისა და რეგლამენტის თანახმად, უფლებამოსილნი ვართ შევიკრიბოთ საკუთარი ინიციატივით. რიგგარეშე სხდომის დღის წესრიგში წარმოდგენილია სულ ორი საკითხი: საქართველოს იუსტიციის უმაღლესი საბჭოს წევრების არჩევის საკითხი, საქართველოს კონსტიტუციური კანონის პროექტი, საქართველოს კონსტიტუციაში ცვლილების შეტანის თაობაზე, პირველი და მეორე მოსმენით და კონსტიტუციური კანონპროექტის აჭარის ავტონომიური რესპუბლიკის შესახებ, პირველი და მეორე მოსმენით”, – აღნიშნა ირაკლი კობახიძემ.