დღეს, საქართველოს დედაქალაქში, თბილისი პრაიდის ფარგლებში გათვალისწინებული, წინასწარ დაანონსებული ღონისძიებების გაშუქების პროცესში სხვადასხვა მედიასაშუალებების წარმომადგენლები რადიკალური, ჰომოფობიურად განწყობილი, აგრესიული ჯგუფების სამიზნეებად იქცნენ. რადიკალურმა ჯგუფებმა ფიზიკური შეურაცხყოფა მიაყენეს მთავარი არხის, ტვ პირველის, ფორმულას, რუსთავი-2-ის, პალიტრანიუსის ჟურნალისტებსა და ოპერატორებს, ფოტოგრაფებს, რამდენიმე კოლეგამ სხეულის მძიმე დაზიანება მიიღო. დამტვრეულია ტექნიკა.
აღსანიშნავია, რომ ეს ყველაფერი ხდება ხელისუფლების უმაღლესი ეშელონების წარმომადგენელთა რბილი, ხშირ შემთხვევაში, ორაზროვანი განცხადებების ფონზე, რაც ახალისებს მედიის მიმართ ძალადობას.
ტელერადიოკომპანია “ოდიში” შეშფოთებას გამოთქვამს ბოლო დროს მედიის წარმომადგენლებზე გახშირებული თავდასხმების გამო, სრულ მხარდაჭერას და თანადგომას უცხადებს კოლეგებს, ხოლო ხელისუფლებას მოუწოდებს, მიიღოს ყველა ზომა, რათა ქვეყანაში დაცული იყოს გამოხატვის თავისუფლება, ხოლო ჟურნალისტურ საქმიანობაში ხელისშეშლა დაისაჯოს კანონის მთელი სიმკაცრით.