ე.წ. სამხრეთ ოსეთის პარლამენტის წევრი სახალხო პარტიიდან ერიკ დუდაევი ავტოავარიას ემსხვერპლა. ინფორმაციას ამის შესახებ ავრცელებს საინფორმაციო სააგენტო ,,სპუტნიკ აბხაზიი" სამხრეთ ოსეთის შს მინისტრის ახსარ ლავოევის შეტყობინებაზე  დაყრდნობით.

როგორც ინფორმაციაშია ნათქვამი, ერიკ დუდაევმა ვერ დაიმორჩილა ,,ლექსუსის" საჭე და  ცხინვალ – ძაუგის ავტოტრასის მეექვსე კილომეტრზე ხიდიდან გადაიჩეხა.  მანქანაში იგი მარტო იჯდა. ინცინდენტი ხუთშაბათს, გვიან  ღამით მოხდა. 

ერიკ დუდაევი აქტიურად მონაწილეობდა ქართველების წინააღმდეგ ომში. იგი ორგზის იყო არჩეული  ე.წ. სამხრეთ ოსეთის პარლამენტში, მეორედ დეპუტატი გახდა 2014 წლის არჩევნებში. სხვადასხვა დროს 2009 წლამდე მსახურობდა სამხრეთ ოსეთის თავდაცვის სამინისტროში, 2009 წლიდან ხელმძღვანელობდა  საპარლამენტო კომიტეტს თავდაცვისა და უსაფრთხოების საკითხებში. 

ერიკ დუდაევი საკმაოდ კარგად არის ცნობილი ქართული საზოგადოებისთვის. იგი დაიბადა სოფელ არწევში, სრულიად ახალგაზრდამ აიღო იარაღი და სეპარატიტ მებრძოლებს შეუერთდა, რასაც  ხსნიდა იმით, რომ ცამეტი წლისას თვალწინ მოუკლეს მამა და გადაუწვე სახლი.  მისი ძმაა  ცნობილი კრიმინალი და ტერორისტი  მარეკ დუდაევი, რომელმაც  ცხრა წელი გაატარა საქართველოს ციხეებში მრავალრიცხოვან ტერორისტულ აქტებში მონაწილეობის ბრალდებით. 

ერიკ დუდაევი აქტიურად მონაწილეობდა როგორც 90 – იანი წლების, ისე 2008 წლის აგვისტოს ომში. დაჯილდოებული იყო მედლით ,,მამულის დამცველი"