კრიმინალური გარჩევა რუსეთის დედაქალაქში: მოსკოვის გარეუბანში საქართველოს მოქალაქე მოკლეს, მკვლელობამდე კი სასტიკად აწამეს. “ოდიშინიუსის” ექსკლუზიური ინფორმაციით, შემთხვევა რამდენიმე დღის წინ მოხდა და კრიმინალურ გარჩევას უკავშირდება. წყარომ, რომელმაც ვინაობის გამხელა არ ისურვა, “ოდიშინიუსს” უთხრა, რომ დაახლოებით 30 წლამდე ახალგაზრდა კაცი ჯერ სასტიკად აწამეს, შემდეგ კი მოკლეს და ცხედარი დაასახიჩრეს. წყაროს თქმით, ცხედარი იმდენად დაზიანებულია, რომ მისი გაგზავნა ჭირისუფლებისთვის ჯერაც არ გადაწყვეტილა.
“ახალგაზრდა ბიჭი, რომელსაც ე.წ. “ობშჩიაკი” ებარა, სასტიკადაა ნაწამები. ჩვენი ინფორმაციით, მის ცხედარს თავი მოაჭრეს და ღობის ცხაურზე წამოაცვეს, სხეულის დანარჩენი ნაწილი კი ამ დრომდე არაა ნაპოვნი, სავარაუდოდ, ის დაწვეს. აქედან გამომდინარე, ისევ ღიად რჩება სამშობლოში ცხედრის გადასვენების საკითხი, სანამ სხეულის დანარჩენი ნაწილები არ უპოვნიათ”, – უთხრა “ოდიშინიუსს” წყარომ, რომელმაც ინკოგნიტოდ დარჩენა ისურვა.
წყაროს თქმით, სასტიკად მოკლული ახალგაზრდა კაცი ზუგდიდელია, თუმცა, მან ვინაობის დასახელებისგან თავი შეიკავა.
“იმის გამო, რომ მკვლელობა კრიმინალური იერარქიის ზედა რგოლთანაა დაკავშირებული, ოჯახსაც არ აძლევს ხელს მომხდარი ამბის გახმაურება, აქედან გამომდინარე, ინფორმაცია მკვლელობის შესახებ არ მოხვედრილა არც ქართულ, არც რუსულ მედიაში”, – აცხადებს “ოდიშინისუსის” ინკოგნიტო წყარო.