სახელმწიფო უსაფრთხოების სამსახურის ინფორმაციით, წინასწარი შეთანხმებით ჯგუფის მიერ დიდი ოდენობით თაღლითობის ბრალდებით სამი პირი დააკავეს: ჯგუფმა ერთერთ ინდმეწარმესთან რამდენიმე ადამიანი ფორმალურად გააფორმა, რათა კოვიდპანდემიის კონტექსტით გათვალისწინებული სახელმწიფო დახმარების თანხა 200 ლარი უკანონოდ მიეღო. ამ გზით მათ სახელმწიფოს კუთვნილი 10 ათას ლარზე მეტი მიითვიდეს, “დასაქმებულებს” კი ე.წ. ატკატის სახით 100-100 ლარს ართმევდნენ.
“გამოძიებით დგინდება, რომ კოვიდ პანდემიის პირობებში საქართველოს მთავრობის დადგენილებით განსაზღვრული 200-ლარიანი სოციალური დახმარების მოტყუებით მიღებისათვის, ინდ. მეწარმემ და მასთან დაკავშირებულმა პირებმა ორგანიზება გაუწიეს რამდენიმე ათეული პირის მობილიზებას და მათთვის ინდ. მეწარმესთან, 2020 წლის იანვარ-თებერვალში დასაქმების დამადასტურებელი ყალბი დოკუმენტაციის მომზადებას.
აღნიშნული პირების პირადი მონაცემები წარადგინეს ფინანსთა სამინისტროს შემოსავლების სამსახურში, შესაბამისად ყალბი დოკუმენტების გამოყენებით თაღლითურად დაეუფლნენ სახელმწიფოს კუთვნილ 10 200 ლარს.
ამასთან, მატერიალური სარგებლის მიღების მიზნით, ხსენებული პირები გაცემული 200 ლარიანი დახმარებიდან 100 ლარს ე.წ. „ატკატის“ სახით ართმევდნენ ბენეფიციარებს. დადგენილია, რომ აღნიშნული პირები რეალურად არ იყვნენ დასაქმებული ინდ. მეწარმესთან და შესაბამისად არ წარმოადგენდნენ საქართველოს მთავრობის განკარგულებით განსაზღვრულ დასახმარებელ პირთა წრეს,” – ნათქვამია სუს-ის განცხადებაში.