ბოდბელი მთავარეპისკოპოსი იაკობ იაკობაშვილი ნინოწმინდის ბავშვთა პანსიონის ხელმძღვანელად დაინიშნა. ამ თანამდებობას აქამდე მიტროპოლიტი სპირიდონი იკავებდა. პანსიონის დირექტორად დანიშვნის შემდეგ მეუფე იაკობმა პანსიონში მიმდინარე მოვლენებზე ისაუბრა. მიტროპოლიტის თქმით, ის შეთანხმების მიხედვით იმოქმედებს, რომელიც გულისხმობს პანსიონის გარდაქმნას “ევოლუციურად და არა რევოლუციურად”.
“პატრიარქის გადაწყვეტილებაა, მეუფე სპირიდონი იყო დირექტორი, ახლა ვარ მე. დარჩებიან მხოლოდ და მხოლოდ ის ბავშვები, რომლებსაც დარჩენა უნდათ. აქ ძალადობით არც არავის არ ტოვებენ. ჩვენ გვაქვს შეთანხმება, რომელსაც ევროკავშირიც და UNICEF-იც ეთანხმება – ეს გარდაქმნა მოვახდინოთ ევოლუციურად და არა რევოლუციურად.
სრული ნდობა აქვთ სოციალურ მუშაკებს, სახელმწიფოს წარმომადგენლებს და ზედმეტი აჟიოტაჟი არავისთვის საჭირო არ არის. მე როცა ვიქნები და როცა საჭირო იქნება კარი ღიაა ჟურნალისტებისთვის”. – თქვა მეუფე იაკობმა.
გადაწყვეტილება პანსიონატის ირგვლივ განვითარებულ მოვლენებს მოჰყვა. ყოფილი აღსაზრდელები ხელმძღვანელობას ძალადობაში ადანაშაულებენ, საპატრიარქო კი შიგნით სახალხო დამცველს არ უშვებს
.