საქართველოს ფეხბურთის ფედერაციის პრეზიდენტობის კანდიდატი მამუკა კვარაცხელია დღეს ზუგდიდში, სპორტული სამყაროს, საზოგადოებისა და მედიის წარმომადგენლებს შეხვდა. შეხვედრის მთავარი მიზეზი ფედერაციის პრეზიდენტობის კანდიდატის საარჩევნო პროგრამის პრეზენტაცია იყო. მამუკა კვარაცხელიამ შეხვედრის დასაწყისში მიღებულ გადაწყვეტილებაზე ისაუბრა და დამსწრეებს მისი საპრეზიდენტო პროგრამა გააცნო. მისი თქმით, ქართულ ფეხბურთში ძირეული ცვლილებები უნდა განხორციელდეს. მან ასევე ყურადღება ბავშვთა ფეხბურთზეც გაამახვილა. დღევანდელი შეხვედრის ბოლოს ფეხბურთის ფედერაციის პრეზიდენტობის კანდიდატმა  საჯაროდ პირობა დადო, რომ მისი არჩევის შემთხვევაში  ერთი წლის თავზე, 3 ოქტომბერს ზუგდიდში ოთარ გაბელიას სახელობის საფეხბურთო სტადიონის პრეზენტაცია გაიმართება. მამუკა კვარაცხელიამ ასევე ისაუბრა თავისუფალ საარჩევნო გარემოზე. ჩვენ ასევე დავინტერესდით, ერევა თუ არა სახელმწიფო სპორტში და არსებობს თუ არა ხელისუფლების ფავორიტი კანდიდატი ფეხბურთის ფედერაციის არჩევნებში. საქართველოს ფეხბურთის ფედერაციის პრეზიდენტის არჩევნები 3 ოქტომბერს გაიმართება. მანამდე ფედერაციის საპრეზიდენტო კანდიდატები შეხვედრებს განაგრძობენ. ხვალ, 25 სექტემბერს ზუგდიდში ფედერაციის გენერალური მდივნის და პრეზიდენტობის კანდიდატთან რევაზ არველაძესთან შეხვედრაა დანიშნული, ხოლო კვირას, 27 სექტემბერს ზუგდიდში შეხვედრას ლევან კობიაშვილი გამართავს.