ოთხივესთან გვაქვს მრავლობითი ზედაპირული ტრავმები და ექსკორიაციები. ისინი იმყოფებიან გადაუდებელი მედიცინის განყოფილებაში, უტარდებათ კვლევები და მკურნალობა, მათი მდგომარეობა სტაბილურად მძიმეა,
– ასეთია ზუგდიდის რეფერალური საავადმყოფოს ექიმის განმარტება მას შემდეგ, რაც ავარიის შედეგად წალენჯიხის რაიონის სოფელ ფახულანის პირველი საჯარო სკოლის მოსწავლეები კლინიკაში მოათავსეს.
ამჟამად კლინიკაში ოთხი დაშავებული იმყოფება, ავარიის მიზეზი კი, სავარაუდოდ, საჭის ვერდამორჩილება გახდა. ექსპერტიზა არკვევს, იყვნენ თუ არა დაზარალებულები ალკოჰოლის გავლენის ქვეშ. ამ დრომდე არაა გარკვეული, ჰქონდა თუ არა მართვის მოწმობა პირს, რომელიც მანქანას მართავდა.
“ოდიშინიუსი” უკვე წერდა, რომ ავარიით დასრულდა “ბოლო ზარის” აღნიშვნა წალენჯიხის რაიონის სოფელ ფახულანში. მანქანა, სადაც მოსწავლეები ისხდნენ, ხევში გადაიჩეხა. ისინი ზუგდიდის რეფერალურ საავადმყოფოში გადაიყვანეს. დაჟეჟილობასთან ერთად, მათ საკმაოდ სერიოზული მოტეხილობებიც აქვთ.