დმანისის ცენტრში ამ წუთებში ისევ დაძაბული ვითარება და დაპირისპირებაა. გავრცელებულ კადრებში ჩანს, რომ მოსახლეობა ისევ ორადაა გაყოფილი, მათი ნაწილი კი ისევ ხელკეტებითაა შეარაღებული. ადგილზე მობილიზებულია პოლიცია და სპეციალური დანიშნულების რაზმი.
ადგილობრივები ერთმაენთს ქვებით და ხელკეტებით უპირისპირდებიან, მათ შორის ქვებს ესვრიან სამართალდამცავებსაც.
შეგახსენებთ, რომ ადგილობრივი აზერბაიჯანელებმა აქცია ცოტა ხნის წინ დაიწყეს. ისინი გუშინ მომხდარი დაპირისპირების მონაწილეების დასჯას ითხოვენ.
“მთავარი არხის” კადრებში ჩანს, რომ პოლიციას ადგილიდან რამდენიმე ადამიანი გაჰყავს, ჩვენთვის ამ დროისთვის უცნობია ისინი მოქალაქეებს აკავებენ თუ ადგილიდან არიდებენ.
დმანისის მერის, გიორგი ტატუაშვილის მტკიცებით, გუშინ ადგილობრივ აზერბაიჯანელებსა და სვანეთიდან ჩამოსახლებულ ეკომიგრანტებს შორის მომხდარი დაპირისპირება ეთნიკურ ჭრილში არ უნდა განვიხილოთ. მისი თქმით, ასეთი რამ აქამდე არ ყოფილა და არც მომავალში მოხდება.
“ესეთ რაღაც მე მაგალითად 4-წლიანი მერობის პერიოდში პირველად ვნახე. ესეთი რამე არ ყოფილა არასდროს და არც იქნება სამომავლოდ დარწმუნებული ვარ. ეს ეთნიკურ ჭრილში ნამდვილად არ არის იმიტომ, რომ დმანისში ეგეთი რაღაცეები არ ხდება, არც მოხდება არასდროს. შეიძლება რაღაც გაუგებრობა მოუვიდათ ერთმანეთში ან ნასვამი ხალხი იყო ან რაღაც მასეთი, დმანისში ძალიან მეგობრულად ცხოვრობს ყველა ადამიანი”, – თქვა დმანისის მერმა.
მერმა იმედი გამოთქვა, რომ საგამოძიებო უწყებები საგამოძიებო უწყებები სრულად გამოიძიებენ მომხდარს.