ამერიკული არასამთავრობო ორგანიზაცია “ჟურნალისტთა დაცვის კომიტეტი” “მთავარი არხის” ჟურნალისტ, ნინუცა კეკელიასა და ოპერატორ ირაკლი კვარაცხელიაზე თავდასხმის ფაქტს ეხმაურება.
განცხადებაში, რომელიც ორგანიზაციამ საკუთარ გვერდზე გაავრცელა, ნათქვამია, რომ საქართველოს ხელისუფლებამ სწრაფად და დეტალურად უნდა გამოიძიოს მომხდარი, იპოვოს დამნაშავეები და უზრუნველყოს პრესის თავისუფალი და უსაფრთხო ფუნქციონირება.
“საქართველოს ხელისუფლებამ სერიოზულად უნდა აღიქვას ჟურნალისტებზე ნინო კეკელიასა და ირაკლი კვარაცხელიაზე თავდასხმა, საფუძვლიანად გამოიძიოს ინციდენტი და უზრუნველყოს დამნაშავეების აღმოჩენა და მათი პასუხისმგებლობის საკითხი. აუცილებელია, რომ საქართველოში ჟურნალისტებმა შეძლონ მნიშვნელოვანი პოლიტიკური მოვლენების შესახებ თავისუფლად და შიშის გარეშე რეპორტაჟების გაკეთება, ხელისუფლების ამოცანაა მათი უსაფრთხოება”, – თქვა CPJ– ს ევროპული და ცენტრალური აზიის პროგრამის კოორდინატორმა, გულნოზა საიდმა.
განცხადებაში ასევე ნახსენებია 2020 წლის სექტემბერში მარნეულში მომხდარი ინციდენტი და წერია, რომ ადგილზე მყოფმა პოლიციამ ჟურნალისტების უსაფრთხოება არ დაიცვა.
4 მაისს “მთავარი არხის” გადამღები ჯგუფი ივერი მელაშვილთან ერთად დავით გარეჯში “შაბათის მთავარისთვის” რეპორტაჟის გადასაღებად იყო ჩასული, რა დროსაც მათ თავს ჯერ ნასვამი სასულიერო პირები, შემდეგ კი მოქალაქეები დაესხნენ. გამოძიება მხოლოდ 126-ე ძალადობის მუხლით დაიწყო.