დაწესდება თუ არა რთული ეპიდვითარებიდან გამომდინარე ქვეყანაში დამატებითი რეგულაციები – ამ თემის განსახილველად დღეს, პრემიერის მეთაურობით, კოვიდსაბჭო შეიკრიბება. ჯანდაცვის მინისტრის ინფორმაციით, ბოლო პერიოდის განმავლობაში შრომითი ინსპექციის მხრიდან ინტენსიური მონიტორინგი მიმდინარეობს, გამკაცრდა დაჯარიმებებიც. შემთხვევების აგრესიული მატების შემთხვევაში უწყებაში გარკვეული შეზღუდვების ამოქმედებას არ გამორიცხავენ, თუმცა ამბობენ, რომ ფართომასშტაბიან ლოკდაუნზე საუბარი ამ ეტაპზე არ არის.
მინისტრის მოადგილე თამარ გაბუნიას თქმით, საბჭოზე განხილული იქნება იმ შეზღუდვების აღსრულება, რომელიც დაწესებულია სოციალური ღონისძიების რეგულირებისთვის. ასევე მისი განცხადებით, დამატებითი შეზღუდვების დაწესება ინფიცირების მაჩვენებელზე იქნება დამოკიდებული.
საქართველოში გუშინ 1800-მდე დაინფიცირების ახალი ფაქტი გამოვლინდა, გარდაიცვალა 10 ადამიანი; ამჟამად, აქტიური შემთხვევების რაოდენობა 10 000-ს აღემატება. მნიშვნელოვნად გაზრდილია დადებითობის პროცენტული მაჩვენებელიც.