თბილისში სამშენებლო კომპანია “ალიანსში”დასაქმებული მუშის 49 წლის ომეხი ფიფიას ცხედარს რამდენიმე საათში მშობლიურ სოფელ მუჟავაში ჩამოასვენებენ. იგი ჭავჭავაძის გამზირზე მშენებარე კორპუსის მეორმოცე სართულიდან გადმოვარდა, შახტაში ჩავარდა და დაიღუპა. “ჩვენც გავრცელებული ინფორმაციით გავიგეთ,მერე კომპანიას დავუკავშირდით… ასეთი ტრაგედია დაგვემართა…”,-ამბობს ბიძაშვილი მზია ფიფია. მეზობლის ვალიდა ქარდავას თქმით, ომეხი მშრომელი კაცი იყო. “იგი იყო ჩვენი 200 კომლიანი სოფლის თვალი,კეთილი,უბოროტო ადამიანი. ეს სოფლის ტრაგედიაა. იგი იყო მთელი ოჯახის მარჩენალი. ორი სტუდენტი შვილი ჰყავს”,-ამბობს იგი. შეგახსენებთ, რომ გარდაცვლილი მუშა წალენჯიხის მუნიციპალიტეტის სოფელ მუჟავას მკვიდრია. მას მეუღლე და ორი შვილი დარჩა. როგორც სოფელ მუჟავაში მერის წარმომადგენელი მამუკა ჩხაპელია აცხადებს, გარდაცვლილის ცხედარს მშობლიურ სოფელში დღეს საღამოს ჩამოასვენებენ. შსს- ცნობით მომხდარ ფაქტთან დაკავშირებით მიმდინარეობს გამოძიება.