“მომდევნო ყრილობის შემდეგ მე აღარ ვიქნები პარტიის გენერალური მდივანი. […] პარტიული თანამდებობა მე არ მექნება არანაირი”, — განაცხადა ევროპული საქართველოს ლიდერმა, გიგი უგულავამ. მისი თქმით, არჩევნების შედეგები არ იყო კარგი და ის იღებს პასუხისმგებლობას ამასთან, ფიქრობს, რომ პარტიის განახლებისთვის საჭიროა მინიმუმ სამივე ლიდერის გადადგომა.

გიგი უგულავა ამბობს, რომ აქტიურად აპირებს პოლიტიკაში დარჩენას.

,,გარდა პარტიული ვალდებულებებისა, მაქვს ძალიან ბევრი ინტერპარტიული ვალდებულება, ჩემს თავს ვთვლი და ვხედავ საერთო ოპოზიციური პლატფორმის კოორდინაციაში წვლილის შეტანაში, თუნდაც წყლის დასხმაში, კულტივირებაში, საერთო ოპოზიციური გეგმის შემუშავებაში, და საერთოდ ამ, მათ შორის, დაპირისპირების შემთხვევაში რამენაირად მაგიდის მომრგვალებაში.

ეს არის საქმე, რასაც ნოემბრიდან მოყოლებული ჩემი დროის 80%-ს ვუთმობ, ამიტომ, ვფიქრობ, ჩემი კოლეგების მხარდაჭერით, სხვა პარტიის კოლეგებს ვგულისხმობ, ამ საქმეს ჩვენ ერთად შევძლებთ…

იმიტომ, რომ დღეს საზოგადოების მოთხოვნაა, მერაბ კოსტავას სიტყვების პერიფრაზს გავაკეთებ – საზოგადოებას აინტერესებს, სად იქნება ეროვნული მოძრაობა და არა, სად ვიქნები მე, ეროვნულ მოძრაობაში”