თბილისის  საქალაქო სასამართლოში გიგი უგულავას პროცესი მიმდინარეობს,იხილება საქმე, რომელიც თბილსერვისისა და რიყის პარკის ეპიზოდებს აერთიანებს. სასამართლოს წინაშე დასკვნითი სიტყვით უნდა წარსდგეს გიგი უგულავას ადვოკატი. 

სხდომას გიგი უგულავაც ესწრება, ის უკვე მიყვანილია  საქალაქო სასამართლოში, თუმცა კი ადვოკატი ბექა ბესელია პროცესის დაწყების წინა გამოთქვამდა იმედს, რომ  სიტყვით გამოსვლა კონსტიტუციის დაღვევით პატიმრობაში მყოფი გიგი უგულავას თანხლებით არ მოუწევდა.

გიგი უგულავას სასამართლო დარბაზში აპლოდისმენტებით შეხვდნენ. პროცესს ესწრებიან თბილისის ყოფილი მერის ოჯახის წევრები და „ნაციონალური მოძრაობის“ წარმომადგენლები,  .  სასამართლოსთან კი დილიდან არიან შეკრებილები მოქალაქეები, რომელნიც საკონსტიტუციო სასამართლოს გადაწყვეტილების საფუძველზე უკანონო პატიმრობაში მყოფი გიგი უგულავას სასამართლო დარბაზიდან გათავისუფლებას მოითხოვენ, ისინი აცხადებენ, რომ გიგი უგულავა ე.წ. მატროსოვის ციხეში უკვე 12 საათზე მეტია უკანონოდ იმყოფება.

"დესპოტური რეჟიმი,"-  ასე ეხმაურება დეპუტატი გოკა გაბაშვილი, საკონსტიტუციო სასამართლოს მიერ მიღებული გადაწყვეტილების მიუხედავად, გიგი უგულავას პატიმრობაში ყოფნის ფაქტს –  "საერთოდ აღარაფერი არსებობს. ჩვეულებრივი დესპოტური რეჟიმია, სადაც შეიძლება გამართლებული ადამიანი იყოს პატიმარი. გუშინ 9 საათიდან გიგი უგულავა საკონსტიტუციო სასამართლოს უკანონო პატიმრად სცნო,"- აცხადებს იგი   

რამდენიმე წუთის წინ საქალაქო სასამართლოსთან დეპუტატმა სერგო რატიანმა  მოუწოდა სახალხო დამცველს  უჩა ნანუაშვილს ოფიციალური განცხადება გააკეთოს საკონსტიტუციო სასამართლოს მიერ მიღებულ გადაწყვეტილებაზე და მის შესრულებასთან დაკავშირებით . "რაც დღეს ხდება, არის სამარცხვინო ქართული სახელმწიფოსთვის. სასწრაფოდ უნდა იყოს განთავისუფლებული გიგი უგულავა. იმალებიან. ჯერ იმალებოდა სასჯელაღსრულების მინისტრი. დღეს იმალება სახალხო დამცველი. ეს შემაშფოთებელია," -განაცხადა   სერგო რატიანმა. 

რაც შეეხება მმართველი ძალის  პოზიციას, პარლამენტის ვიცესპიკერი  მანანა კობახიძე მიიჩნევს, რომ „სასამართლო ბრძანება დაპატიმრების შესახებ უნდა შეიცვალოს მხოლოდ საერთო სასამართლოების მოსამართლის ბრძანებით. ასეთი აჟიოტაჟის შექმნა, მივარდნები ციხესთან – ეს არ არის სწორი და ემსახურება ერთადერთს – შექმნან ზედმეტი აჟიოტაჟი და დესტაბილიზაციის ფონი ქვეყანაში- აცხადებს მანანა კობახიძე და ურჩევს ნაციონალურ მოძრაობას   საერთო სასამართლოს მოსამართლის გადაწყვეტილებას დაელოდოს.

თავად გიგი უგულავამ   პროკურორებს უგულავამ რამდენიმე შეკითხვა დაუსვა და სამართლებრივი პროცედურები განუმარტა, რის საფუძველზეც მისი თქმით, უკანონო პატიმრობაში იმყოფება. 

"ვიცოდი, რომ დამაპატიმრებდა ივანიშვილი, ვიცოდი, რომ ეს გზა უნდა გამევლო. ისიც ვიცოდი, რომ საკონსტიტუციო სასამართლო ამ გადაწყვეტილებას მიიღებდა. შეუძლებელია სასამართლოს ეთქვა, რომ ეს ნორმა კონსტიტუციურია – ეს რუსეთში და ბელარუსშიც არ ხდება. ხდება მხოლოდ ჩრდილოეთ კორეაში", – განაცხადა უგულავამ.