კრიტიკული მედიის წარმომადგენლები არ გამორიცხავენ, რომ ოლიგარქის მთავარი სამიზნე, ნიკა გვარამიასა და “მთავარი არხის” შემდეგ, თავად გახდნენ.
ჟურნალისტი და ტელეწამყვანი ინგა გრიგოლია ამბობს, რომ არაა გამორიცხული, ნიკა გვარამიას დევნის პარალელურად, ხელისუფლებამ თაროზე შემოდებული საქმე განაახლოს ტვ “პირველის” დამფუძნებლისა და მისი მამის – ვატო და ნუგზარ წერეთლების მიმართ.
ტვ “კავკასიის” დირექტორი ნინო ჯანგირაშვილი მიიჩნევს, რომ ივანიშვილი სიამოვნებით დახურავდა “მთავარ არხსაც” და სხვა კრიტიკულ მედიასაც. მისი თქმით, ივანიშვილი მიიჩნევს, რომ გაიმარჯვა და ახლა რეპრესიებზე გადასვლას აპირებს.
მესამე სექტორში კი მიიჩნევენ, რომ ნიკა გვარამიას მიმართ განახლებული დევნა ერთგვარად, პოლიტიკური გზავნილის შემცველია. მათივე თქმით, ოლიგარქი სახელმწიფო უწყებებს იყენებს, რათა კრიტიკული მედია დასაჯოს.
ოპოზიციის წარმომადგენლები ამბობენ, რომ ნიკა გვარამიას მსგავსი მუქარით ვერ შეაშინებენ, ხოლო “მთავარი არხი” მაინც არ გაჩერდება, თუნდაც ნიკა გვარამია დააკავონ.
შეგახსენებთ, ნიკა გვარამიამ გუშინ, 12 დეკემბერს დაწერა, რომ ხელისუფლება საახალწლოდ მის დაკავებას გეგმავს, ასევე, თქვა, რომ ელჩების კეთილი სურვილი ესმის, მაგრამ “ოცნებამ” ისინი ტყვეთა ბაზრის ბროკერებად აქცია. მისივე თქმით, აშშ-ს საელჩოდან საგრანტო დაფინანსებებზე უარი მისდის ბზიშვილის ხელმოწერით.
ამასთან, ნიკა გვარამია ხაზს უსვამს, რომ ემსახურება დასავლეთს, მაგრამ პერიოდულად იღებს დანას ზურგში, მათ შორის, კელი დეგნანისგან.