დღეს საოლქო კომისიების თავმჯდომარეებმა შემაჯამებელ ოქმებს ხელი მოაწერეს და არჩევნებიც საბოლოოდ ქართული ოცნების სასარგებლოდ გააფორმეს.
საქართველოს ყველა რეგიონში, ყველა საოლქო კომისიის შენობასთან ოპოზიციური პარტიების მხარდამჭერებმა კიდევ ერთხელ გააპროტესტეს გაყალბებული არჩევნები და წართმეული ხმები.
მოპარული ხმები და გაყალბებული არჩევნების შედეგები გააპროტესტა დღეს თბილისის, ბათუმის, გორის, ოზურგეთის, წყალტუბოს მოსახლეობამაც. გაბრაზებული ამომრჩევლები ისევე როგორც მთელ საქართველოში, სამეგრელოს თითქმის ყველა საოლქო კომისიასთან, ზუგდიდში, ფოთსა და მარტვილში შეიკრიბნენ.
საოლქო კომისიის შენობებს პოლიცია იცავდა, აქციის მონაწილეებს შიგნით შესვლისა და პროტესტის გამოხატვის უფლებას არ აძლევდნენ. ოპოზიციური პარტიების ლიდერებმა კიდევ ერთხელ შეახსენეს ბიძინა ივანიშვილის ხელისუფლებას, რომ გაყალბებული არჩევნებით მიღებული გამარჯვება დროებითია
. თუმცა ათასობით ადამიანის ხმა საოლქო კომისიის არც ერთმა თავმდჯომარემ ვერ, ან არ გაიგო. შემაჯამებელ ოქმზე ყველამ მოაწერა ხელი და ოფიციალურად გააფორმა 2020 წლის გაყალბებული საპარლამენტო არჩევნები.