„საქართველოს კათოლიკოს-პატრიარქმა, უწმინდესმა და უნეტარსემა ილია მეორემ ბრძანა, გადაეცით მრევლს, რომ სიწმინდე დარჩება ზუგდიდში“ – ამის შესახებ ზუგდიდისა და ცაიშის ეპარქიის მიტროპოლიტმა მეუფე გერასიმემ დღეს ივერიის ღვთისმშობლის მშენებარე ტაძარში მრევლს და სასულიერო პირებს წირვის დასრულების შემდეგ აცნობა. მეუფე გერასიმე გუშინ საზოგადოების წარმომადგენლებთან და სასულიერო პირებთამ შეხვედრის შემდეგ საქართველოს საპატრიარქოში, ილია მეორესთან შესახვედრად გაემგზავრა. პატრიარქთან  შეხვედრის მთავარი მიზეზი საქართველოს კულტურისა და ძეგლთა დაცვის მინისტრის პირველი მოადგილის ლევან ხარატიშვილის მიერ ხელმოწერილი განკარგულება იყო, რის საფუძველზეც სამინისტრომ ნება დართო ხობის დედათა მონასტრის წინამძღვარს დეკანოზ ილია ლომაიას ზუგდიდის დადიანების სასახლის მუზეუმში დაცული სიწმინდეებისა და ღვთისმშობლის კვართის გადაბრძანებაზე ხობის ხარების დედათა მონასტერში. აღნიშნულ გადაწყვეტილებას საზოგადოების მყისიერი რეაქცია მოჰყვა. ისინი აცხადებდნენ, რომ ღვთისმშობლის შესამოსელი უდიდესი სიწმინდეა, რომელსაც მოვლა და პატრონობა სჭირდება და ის თუნდაც ერთი დღით არ უნდა იქნეს გატანილი ზუგდიდის ისტორიული მუზეუმიდან.