ჭიათურის მაღაროში კიდევ ერთი ადამიანი დაიღუპა ტრაგიკულად. – არაადამიანურმა სამუშაო პირობებმა ამჯერად სამი შვილის მამა, 46 წლის კობა ჩაფიძე შეიწირა – მას ტრაქტორმა გადაუარა. – ინფორმაციას ამის შესახებ მთავარი ოპოზიციური პარტიის კანდიდატი საჩხერე-ჭიათურა-ხარაგაულის ოლქში, გიორგი კაპანაძე ავრცელებს.
,,აღარ დასრულდა ტრაგედიები ჭიათურის მაღაროებში. ეს, ბოლო თვენახევრის განმავლობაში, მაღაროზე გარდაცვალების მეორე შემთხვევაა. ძალიან ვწუხვარ მომხდარის გამო და ვუსამძიმრებ გარდაცვლილის ოჯახს”, – წერს გიორგი კაპანაძე “ფეისბუქზე”.
“ასეთი ტრაგედიები იმიტომ ხდება რომ არ არის დაცული უსაფრთხოების ნორმები. კორუფციაში იხრჩობა ქალაქი და არავინ ზრუნავს მაღაროელებზე, რომლებიც ყოველდღიურად, საკუთარი სიცოცხლით რისკავენ იმისათვის რომ ოჯახი გამოკვებონ. მსგავსი ცინიკური მიდგომა წელსვე უნდა შეიცვალოს. მაღაროელებს უნდა ჰქონდეთ როგორც ღირსეული შემოსავალი, ისე უსაფრთხო სამუშაო გარემო” – ამბობს გიორგი კაპანაძე.