აფხაზური მედიის ცნობით ოკუპირებული აფხაზეთის დე ფაქტო პრეზიდენტის, ასლან ბჟანიას თანაშემწე, ლაშა საქანია ქართველ პოლიტიკოსებთან შეხვედრის შემდეგ თანამდებობიდან გადადგა. მის ამ შეხვედრას აფხაზურ საზოგადოებაში დიდი კრიტიკა მოჰყვა.
“ძვირფასო მეგობრებო, 2020 წლის 18 აგვისტოს განვითარებული მოვლენის გამო, იმისათვის, რომ საზოგადოებაში არსებული დაძაბულობა განიმუხტოს, მივიღე გადაწყვეტილება, განცხადება დავწერო და საკუთარი სურვილით წავიდე. თუმცა მინდა აღვნიშნო, რომ ყველგან და ყოველთვის ვიქნები ჩემი ერისა და სახელმწიფოს სადარაჯოზე”, — განაცხადა საქანიამ.
აფხაზეთის დე ფაქტო პრეზიდენტის წარმომადგენელმა, ლაშა საქანიამ თავიდან უარყო, შემდეგ კი დაადასტურა რომ ოკუპირებულ რეგიონში პატრიოტთა ალიანსის ლიდერებს შეხვდა. მისი თქმით, აგვისტოს დასაწყისში მეგობრები დაუკავშირდნენ რუსეთის ფედერაციიდან, რომლებმაც სთხოვეს დახმარებოდა დავით თარხან-მოურავს, რომელსაც სურდა, ილორის ეკლესიისთვის ღვთისმშობლის ხატი გადაეცა. საქანიას თქმით, ამ თხოვნას “ჰუმანიტარული მიზნებით” დათანხმდა.
საყანიას განცხადების შემდეგ, შეხვედრა პატრიოტთა ალიანსის ლიდერმა, ირმა ინაშვილმაც დაადასტურა, რომელიც მანამდე ამ საკითხზე კომენტარს არ აკეთებდა. ინაშვილმა ოკუპირებულ აფხაზეთში .ვიზიტისას გადაღებული ფოტოებიც გამოაქვეყნა. მისი თქმით, ფოტოები 18 აგვისტოს აფხაზეთში, ილორის ტაძარშია გადაღებული, სადაც მან ტაძარს ღვთისმშობლის ხატი შესწირა.