კარანტინის 12-დღიანი პერიოდი სვანეთში, დაბა მესტიისა და ლენჯერის გარდა მუნიციპალიტეტის სხვა ყველა სოფელში დასრულებულია. გადაწყვეტილება პრემიერ-მინისტრის ხელმძღვანელობით მოქმედმა უწყებათაშორისმა საკოორდინაციო საბჭომ 19 აგვისტოს სხდომაზე მიიღო.
მიმდინარე კვლევების გათვალისწინებით, საკარანტინო შეზღუდვები დროებით ნარჩუნდება დაბა მესტიასა და ლენჯერში, თუმცა ეს საკითხი ეპიდემიოლოგიური ვითარების შესაბამისად გადაიხედება.
სამეგრელო-ზემო სვანეთში სახელმწიფო რწმუნებულის მოადგილის ნინო ვიბლიანის ინფორმაციით, დღეს მესტიაში ეპიდემიოლოგთა 18 კაციანი ჯგუფი იმუშავებს, ასევე, განმეორებითი ტესტირება დღეს იგეგმება 500 პირისთვის.
საკარანტინო სივრცეებში მყოფი ადამიანები მას შემდეგ შეძლებენ საკარანტინო ზონებია დატოვებას, რაც განმეორებითი ტესტების პასუხები ცნობილი გახდება. ამ დრომდე მასიური თერმოსკრინინგი 2000-მდე პირს ჩაუტარდა. მესტიაში საკარანტინო შეზღუდვები 10 აგვისტოს დაწესდა.
დასახლებებში, სადაც შეზღუდვები კვლავ ძალაშია ინტენსიური ტესტირება გრძელდება. თითქმის 2 კვირის განმავლობაში მესტიაში სულ 49 დადასტურებული შემთხვევა გამოვლინდა.