რუსთაველის ქუჩაზე, სადაც ამ ეტაპზე წყალსაწრეტი არხის სამუშაოები მიმდინარეობს, იშვიათი დეკორატიული ჯიშის აკაციები განადგურებულია. მძიმე ტექნიკის მუშაობამ ხეების ფესვები მთლიანად დააზიანა და მათი ნაწილი წაქცევის პირასაა.ადგილობრივების ინფორმაციით, არათუ ლამაზდება ტერიტორია, პირიქით, მახინჯდება და მწვანე საფარი კატასტროფის ზღვარზეა. ზუგდიდი-ანაკლიის შიდასახელმწიფოებრივი მნიშვნელობის საავტომობილო გზის რუსთაველის ქუჩის მონაკვეთზე, კერძოდ ჩხოუშიის ხიდიდან ე.წ კუჩხობონის ხიდამდე გზის სავალი ნაწილზე მოძრაობა 10 ივლისიდან 20 ივლისამდე სრულად შეზღუდული იყო. მოსახლეობა ეჭვობს, რომ სამუშაოების დასრულების შემდგომ ქუჩა არათუ აღდგება და გალამაზდება, არამედ სრულად დამახინჯდება და ხეებიც მალე გახმება.
ჩვენ ამ საკითხზე ზუგდიდის მუნიციპალიტეტის მერიას მივმართეთ, უწყებაში კომენტარის გაკეთებაზე უარი თქვეს და გვითხრეს, რომ პასუხისმგებლობა მთლიანად იმ კომპანიაზეა, რომელიც ადგილზე მუშაობს. მათი თქმით, სამშენებლო პროცესში დაზიანებულ ხეებზე თვითონ კომპანია აიღებს განახლების ვალდებულებას. თუმცა, რა ფორმით და როგორ მოხდება აღდგენა, გაუგებარია, რადგან ხეების დიდ ნაწილს ფესვები ისე აქვს დაზიანებული, რომ გახმობის პირასაა. სამუშაოებს შპს „ნიუ როად გროუპი“ ახორციელებს, კომპანიაში აცხადებენ, რომ ხეების დაზიანების შესახებ ინფორმაცია არ აქვთ და ჩვენგან გაიგეს.
შეგახსენებთ, რომ ხეების დარგვა და ქალაქის გამწვანება იშვიათი და უნიკალური ჯიშის დეკორატიული ხეებით წინა ხელისუფლების დროს ადგილობრივი მუნიციპალიტეტის უშუალო ძალისხმევით მოხდა. დღეს კი ხელისუფლება მასზე არათუ ზრუნავს, არამედ ანადგურებს.