,,მთის ამბების'' ინფორმაციით, ახმეტის გამგეობამ თუშეთში მუდმივად მცხოვრებ 25 პირს, საახალწლო საჩუქრის სახით, საკვები პროდუქტების 50-ლარიანი პაკეტები 21 თებერვალს გადასცა. დაახლოებით 1250 ლარის ღირებულების პროდუქტების ვერტმფრენით გადატანისთვის ადგილობრივი ბიუჯეტიდან 20-ჯერ მეტი თანხა – 25 500 ლარი დაიხარჯა. საახალწლო პროდუქტების გადაცემის მიზეზით, თუშეთში გაფრინდნენ და იქეიფეს ახმეტის გამგებელმა, მისმა მოადგილემ, საკრებულოს თავმჯდომარემ, გუბერნატორმა, მაჟორიტარმა დეპუტატმა, პოლიციის უფროსმა, მისმა მოადგილემ და სხვებმა.
თუშეთში მუდმივად მცხოვრები პირებისთვის პროდუქტების გადაცემის "მიზეზით" ვერტმფრენით იმოგზაურეს ახმეტის გამგებელმა ბექა ბაიდაურმა, გამგებლის პირველმა მოადგილემ ვანო ნასყიდაშვილმა, გამგეობის საფინანსო-საბიუჯეტო სამსახურის უფროსმა არსენ ბუღრიძემ, ახმეტის საკრებულოს თავმჯდომარემ გელა ჯუგაშვილმა. ამ „მისიაში“ კახეთის გუბერნატორმა ირაკლი ქადაგიშვილმა,ახმეტა-თელავის მაჟორიტარმა დეპუტატმა გელა სამხარაულმა , ახმეტის პოლიციის უფროსმა ბესიკ ონიანმა და მისმა მოადგილემ გიორგი აბელაშვილმა, რომელთაც თან ახლდნენ ტელეკომპანია „იმედის“ ჟურნალისტი და ოპერატორი და რამდენიმე კერძო პირმაც – ადგილობრივმა მეწარმემ ზურაბ ბაბულაიძემ (შპს „ტექნოვინის“ დირექტორი), მისმა მეგობარმა რატი კოჭლამაზაშვილმა და სხვებმა, მათ ადგილობრივების თქმით გულუხვად მოილხინეს.
ის გარემოება, რომ თუშეთში მუდმივად მცხოვრები პირებისთვის რამდენიმე კილოგრამი შაქრის ფხვნილის, მაკარონისა და 200 გრამამდე ყავის გადაცემის აქცია მოსახლეობის მატერიალურ უზრუნველყოფას არ ემსახურება და მხოლოდ სიმბოლური დატვირთვა აქვს, გადაცემული პროდუქტების მიზერული ოდენობიდანაც ჩანს და მისი გადაცემის ვადაც იგივეს ადასტურებს – „საახალწლო საჩუქრებად“ სახელდებული საკვები პროდუქტი ადრესატამდე თითქმის 2 თვის დაგვიანებით აღწევს