დღეს დილით აფხაზეთის სკოლებში მეცადინეობები შეწყდა. პირველი გაკვეთილის შემდეგ ბავშვები სახლებში დაითხოვეს, რადგან გაუთბობელ საკლასო ოთახებში ტემპერატურა მკვეთრად დაეცა.
ელექტროდენის გათიშვა დიდთოვლობის გამო სადენების დაზიანებამ გამოიწვია. დღეს დილით მწყობრიდან გამოვიდა ქვესადგური ,,ბზიფი’’, რომელიც სოხუმს აწვდის დენს. აფხაზეთის განათლების სამინისტროს განცხადებით, მეცადინეობები არ განახლდება ხვალაც და შესაძლოა გამოდარებამდე – ერთი კვირის განმავლობაშიც არ განახლდეს. სინოპტიკოსები გამოდარებას პარასკევამდე არ მოელიან.
წუხელ აფხაზეთში მთელი ღამე თოვდა, თოვა ალაგ ალაგ ინტენსიურად გრძელდება დღესაც. გზებზე, მათ შორის, სოხუმის ქუჩებშიც შეფერხებებია.
სეპარატისტული აფხაზეთის პრეზიდენტის ხაჯიმბას განკარგულებით შექმნილია სტიქიიის შედეგების ლიკვიდაციის ოპერატიული შტაბი, რომელსაც პრემიერი ბესლან ბარციცი ხელმძღვანელობს.