დღეს ნატო-ს გენერალური მდივანთან იენს სტოლტენბერგთან შეხვედრის შემდეგ გაკეთებულ ვრცელ განცხადებაში საქართველოს პარლამენტის თავმჯდომარემ დავით უსუფაშვილმა სხვა საკითხებთან ერთად ნატო-ს საწვრთნელი ცენტრის მნიშვნელობაზეც ისაუბრა.
„ეს ცენტრი უბრალო მოვლენა არ არის. ეს არის ძალიან მნიშვნელოვანი პოლიტიკური დატვირთვის მქონე მოვლენა. იმიტომ, რომ ამ ცენტრის მეშვეობით ნატო-ს წევრი სახელმწიფოები საქართველოს თავდაცვისუნარიანობის განმტკიცებაში კიდევ უფრო აქტიურად იქნებიან ჩართული. იქ სადაც ვართ დღეს, ეს არ არის მხოლოდ დღევანდელი მთავრობის მონაპოვარი, ეს არის რამდენიმე სხვადასხვა პოლიტიკური ჯგუფის, ლიდერის, პრეზიდენტების, მთავრობის, მინისტრების ერთობლივი ჯამური ნაღვაწი, ეს ასე უნდა გაგრძელდეს და ჩვენ უნდა მოვახერხოთ, რომ ის რაც გაკეთებულია, პოლიტიკურ მოვლენებს არ უნდა გადავაყოლოთ,"-განაცხადა უსუფაშვილმა.