თუკი ივანიშვილის და ნარმანიას ნება იყო, მერიის ცენტრალური კარები ჩაეკეტა, ხალხის ნებაა, რომ ეს კარები გააღოს. ჩვენ, ბუნებრივია, ვაძლევთ რამდენიმე საათს დავით ნარმანიას, ან ჩამობრძანდეს, ან აქ შეკრებილი ხალხი, ეს ზვავი აზვირთდება, უამრავი ადამიანი მოვა და ვინ დაკეტავს და ვინ გააღებს კარებს, ამას თავად ნარმანია უშუალოდ დაინახავს ივანიშვილთან ერთად. ფეხს არ მოიცვლის აქედან არავინ, სანამ არ ჩამობრძანდება ნარმანია, ან საკოორდინაციო საბჭოს წევრებს არ მიიღებს. გადალახა ნარმანიამ რუბიკონი, შეუქცევადი პროცესებია დაწყებული და ჩვენ ბოლომდე ვიბრძოლებთ სიმართლისთვის”, – განაცხადა ნიკა მელიამ.
თბილისის მერიასთან „ნაციონალური მოძრაობის“ ერთ-ერთ ლიდერ ნიკა მელიასა და მერიის უსაფრთხოების სამსახურს შორის დაპირისპირება მოხდა. ნიკა მელია შენობაში შესვლას მოითხოვდა, რისი უფლებაც დაცვის სამსახურმა არ მისცა.
თბილისის მერიასთან „ნაციონალური მოძრაობის“ მიერ ორგანიზებული აქცია ამ დრომდე გრძელდება. თბილისის მერიასთან დროდადრო ფიზიკური დაპირისპირება ხდება მერიის, შინაგან საქმეთა სამინისტროს წარმომადგენლებს, პოლიციელებსა და აქციის მონაწილეებს შორის. ადგილზე მობილიზებულია საპატრულო პოლიციის 15-მდე ეკიპაჟი.
აქციის მონაწილეები სკანდირებენ – „ნარმანია, გადადექი“.როგორც აქციის მონაწილეები აცხადებენ, ისინი აპროტესტებენ ქალაქის ბიუჯეტიდან „რუსთავი 2“-ის საქმის მოსამართლე ნატა ნაზღაიძის ოჯახისათვის გადაცემულ რამდენიმე მილიონი ლარის ქონებას.