ხვალ პარლამენტის იურიდიულ კომიტეტში ე.წ. მოსმენების კანონში შესატან ცვლილებებზე იმსჯელებენ, ამის შემდეგ კანონპროექტი ხვალ გავა სესიაზე პირველი მოსმენით განხილვისათვის.
პარლამენტის ოპოზიცური პარტიებისთვის მიუღებელია ხელისუფლების მიერ შემოთავაზებული მოსმენების კანონში შესატანი ცვლილებების პაკეტი . ნაციონალურ მოძრაობაში აცხადებენ, რომ მასში არ არის გათვალისწინებული საკონსტიტუციო სასამართლოს რეკომენდაციები.
სალომე სამადაშვილის აზრით, ხელისუფლება ცდილობს მაქსიმალურად კონტროლის ქვეშ ჰქონდეს გასაღები და აპარატურა, რომელიც მოსმენებისთვის არის განკუთვნილი.
მოძრაობა თავისუფლებისთვის – ევროპული საქართველოს წევრები აცხადებენ, რომ ე.წ. მოსმენების კანონპროექტის მიღების შემთხვევაში, ფარული მიყურადების გასაღები პირდაპირ ბიძინა ივანიშვილის ხელში აღმოჩნდება.
„რაც გვაქვს წარმოდგენილი მოსმენებთან დაკავშირებით, იგივეა, რაც დავუკანონოთ ბიძინა ივანიშვილს და მის დაქვემდებარებულ პირად სტრუქტურებს, ჩვენი მოსმენის კანონიერება. იგივეა, რაც პრაქტიკულად, უკაცრავად ტერმინისთვის, გავუპრავოთ ის, რასაც ისინი დღეს აკეთებენ,“ – განაცხადა ზურაბ ჭიაბერაშვილმა.