ოპოზიციურმა პარტიებმა საერთო მაჟორიტარებთან დაკავშირებით შეთანხმებას მიაღწიეს. უ პარტიები შეთანხმდნენ, რომ ხელისუფლებასთან საბრძოლველად, მაჟორიტარულ ოლქებში საერთო კანდიდატს დააყენებენ.
ოპოზიცია მოლაპარაკებების მაგიდასთან დაბრუნებას პოლიტიკური დევნის პირობებში არ აპირებს. თავის მხრივ, ხელისუფლება ოპონენტებს ულტიმატუმს უწესებს.
„იმ შემთხვევაში, თუ ოლიგარქი არ გადავა პროპორციულ საარჩევნო სისტემაზე, გვაქვს გეგმა, რომ მაჟორიტარულ ოლქებში ოპოზიციურმა პარტიებმა მოვახდინოთ კოორდინაცია და გვყავდეს საერთო კანდიდატები. ძალიან მალე ყველა მნიშვნელოვან ოლქში გვექნება შეთანხმებები, რაც იმის გარანტიაა, რომ ამ სისტემის პირობებშიც კი ქართული ოცნება ვერ გაიმარჯვებს,“ – განაცხადა „ევროპული საქართველოს“ წარმომადგენელმა სერგი კაპანაძემ.
„ნაციონალური მოძრაობის“ წევრის, თინა ბოკუჩავას განცხადებით, გაერთიანებული ოპოზიცია ივანიშვილის მიერ შეთავაზებულ ვარიანტებს არ დათანხმდება. მისივე თქმით, ოპოზიციისთვის მისაღები მხოლოდ ისეთი ვარიანტი იქნება, რომელიც ადამიანებს სამართლიან არჩევნებში მონაწილეობის შესაძლებლობას მისცემს.