„ადამიანის უფლებათა ეროვნული ინსტიტუტების ევროპის ქსელი“ (ENNHRI) „ადამიანის უფლებათა ეროვნული ინსტიტუტების გლობალურ ალიანსთან“, „ომბუდსმენის საერთაშორისო ინსტიტუტთან“, „თანასწორობის უწყებათა ევროპის ქსელთან“ და ადამიანის უფლებათა დამცველების მდგომარეობაზე გაეროს სპექციალურ მომხსენებელთან, მიშელ ფორსტთან ერთად აქვეყნებს საქართველოს სახალხო დამცველის მხარდამჭერ განცხადებას, რომელიც ეხება სახალხო დამცველის ციხეებში ვიზიტების კონფიდენციურობის დარღვევასა და სახალხო დამცველის ინსტიტუტზე შემდგომ თავდასხმებს:

„გამოვხატავთ შეშფოთებას საქართველოს სახელმწიფოს ბოლოდროინდელი მოქმედებების გამო, რომლებიც ეწინააღმდეგება საშინაო, რეგიონულ და საერთაშორისო სტანდარტებს. ამ სტანდარტების მიხედვით, ადამიანის უფლებათა ეროვნული ინსტიტუტები და მისი თანამშრომლები არ უნდა აღმოჩნდნენ რაიმე სახის საპასუხო მოქმედების ან დაშინების წინაშე თავიანთი მანდატით განხორციელებული აქტივობების გამო.

საქართველოს მთავრობის მოქმედებები ქმნის საქართველოს სახალხო დამცველის ეფექტიანი და დამოუკიდებელი საქმიანობისთვის გარემოს გაუარესების საფრთხეს. კონფიდენციური ინფორმაციის გამჟღავნებამ შეიძლება ხელი შეუშალოს სახალხო დამცველის საქმიანობას და საფრთხე შეუქმნას მის თანამშრომლებს. ამას შეიძლება აგრეთვე ჰქონდეს უარყოფითი შედეგები იმ პატიმრებისთვის, ვისაც სახალხო დამცველი შეხვდა და შეიძლება შეარყიოს მათ შორის ნდობა.

განცხადების ავტორები მოუწოდებენ საქართველოს სახელმწიფო უწყებებს დაიცვან ეს საერთაშორისო პრინციპები და სწრაფად და გულდასმით, სახალხო დამცველთან თანამშრომლობით გამოიძიონ მსგავსი შემთხვევები.

საქართველოს ადამიანის უფლებათა ეროვნული ინსტიტუტი არის ადამიანის უფლებათა საერთაშორისო თანამეგობრობის მიერ ძალიან პატივცემული უწყება და მას ხელმეორედ მიენიჭა სტატუსი „A „, რაც მიუთითებს მის სრულ შესაბამისობას გაეროს პარიზის პრინციპებთან“.