საქართველოს პრემიერმინისტრს, გიორგი გახარიას, ამერიკის შეერთებული შტატებიდან კიდევ ერთი კრიტიკული წერილი გამოუგზავნეს – ამჯერად ავტორი ტექსასელი კონგრესმენი რენდი ვებერია.

რენდი ვებერი წერილში წერს, რომ ის უერთდება თავის კოლეგებს კონგრესში და თავადაც შეშფოთებულია პროპორციული საარჩევნო სისტემის დაპირების შეუსრულებლობით, მშვიდობიანი პროტესტის წინააღმდეგ ძალის გამოყენებითა და ოპონენტების პოლიტიკური დევნით.

წერილში ტექსასელი კონგრესმენი რამდენჯერმე აღნიშნავს, რომ საქართველოს უკუსვლა აქვს დემოკრატიულ ღირებულებებსა და ეკონომიკის განვითარებაში და მიუთითებს, რომ ამერიკის შეერთებულმა შტატებმა საქართველოს მხარდაჭერის აქტი (Georgia Support Act) სხვა ღირებულებების მხარდაჭერის გამო მიიღო.

ვებერის წერილის ასლები ამერიკის სახელმწიფო მდივანს მაიკ პომპეოს, ვაჭრობის მინისტრს უილბურ როსს და ფინანსთა მინისტრს სტივენ მნუჩინსაც გაეგზავნათ.

წაიკითხეთ რენდი ვებერის გიორგი გახარიასთვის გაგზავნილი წერილი წერილი სრულად:

“მე გწერთ იმისთვის, რომ შევუერთდე ამერიკის შეერთებული შტატების კონგრესის წევრების მზარდ შეშფოთებას საქართველოში დემოკრატიული ღირებულებებიდან და ეკონომიკური განვითარებიდან უკუსვლის გამო.

ამერიკასთან საქათველოს სტრატეგიული პარტნირობისა და ამერიკის მხრიდან ყოველწლიურად გაცემული დახმარების გამო საქართველოში, თავს იძულებულად ვგრძნობ, რომ შევუერთდე ჩემს კოლეგებს კონგრესში, რომლებმაც გასულ კვირებში წერილები მოგწერეს. მე ვუერთდები მათ გამოხატულ შეშფოთებებებს იმ გადაწყვეტილებასთან დაკავშირებით, რომ უარი გეთქვათ დაპირებულ საარჩევნო რეფორმებზე, მშვიდობიანი პროტესტების წინააღმდეგ გამოყენებული ძალადობის ცნობებთან დაკავშირებით და პოლიტიკური ოპონენტების, მედიის წარმომადგენლების, საერთაშორისო და ამერიკის კორპორაციების და სამოქალაქო საზოგადოების წევრების გაუმართლებელ შევიწროებასთან დაკავშირებით.

გასულ წელს, მე შევუერთდი ჩემს კოლეგებს აშშ-ის წარმომადგენლობით ორგანოში საქართველოს მხარდაჭერის აქტის მიღებისას, რომელიც პირველ რიგში, ჩვენი მხარდაჭერის გამოხატვა იყო თქვენი ქვეყნის დამოუკიდებლობის, სუვერენიტეტისა და ტერიტორიული მთლიანობის მიმართ რუსეთისგან არსებული გამოწვევების წინაშე.

მნიშვნელოვანია აღვნიშნოთ, რომ საქართველოს მხარდაჭერის აქტი არ ითვალისწინებდა ამერიკის მხარდაჭერას საქართველოს მთავრობის მიმართ, რათა გავლენა მოეხდინა შიდა მმართველობაზე ისე, რომ ეს იქნებოდა საწინააღმდეგო ამ ჩანაწერისა – “დემოკრატიული ღირებულებების განვითარება საქართველოში, თავისუფალი და სამართლიანი არჩევნების ჩათვლით, საჯარო უწყებების გამჭვირვალობით და პასუხისმგებლობით, კანონის უზენაესობით და ანტიკორუფციული მუშაობით”.

საქსტატის ინფორმაციაზე დაყრდნობით, პირდაპირ უცხოური ინვესტიციები ქვეყანაში 2017 წლის შემდეგ 50%-ზე მეტით შემცირდა. ამას დამატებით, Transparency International-მა გამოაქვეყნა ყოველწლიური კორუფციის ინდექსი 2019 წელს, რომელიც აჩვენებს, რომ საქართველოს რეინტინგი აგრძელებს უკუსვლას ან გაჩერებულია 2015 წლის შემდეგ. ანგარიშში გამოყოფილია, რომ “სახელმწიფოს მიტაცება” და “ძალაუფლების კონცენტრაცია ერთი ადამიანის ხელში” არის მიმდინარე გამოწვევები. საბოლოოდ, ანგარიშში ასევე წერია, რომ “უკანასკნელი წლების განმავლობაში პროგრესის ნაკლებობა საქართველოში მიუთითებს ქვეყანაში ანტი-კორუფციული რეფორმების სტაგნაციაზე”.

პირდაპირი უცხოური ინვესტიციების კლება, არ არის გასაკვირი და როგორც ჩანს იმ არამეგობრულ გარემოს და შევიწროვებას უკავშირდება, რასაც საქართველოში ევროპული და ამერიკული ბიზნესი განიცდის. ამგვარი ამბის თვალსაჩინო მაგალითი ჩემი მშობლიური შტატის ტექსასის ერთ-ერთი კომპანიის ფრონტერას გამოცდილებაა. საქართველოში ვითარების გარემოს გაუარესების კიდევ ერთი შემთხვევა ამერიკულ კომპანიას, ფეისბუქს უკავშირდება. ცოტა ხნის წინ კომპანიაში განაცხადეს, რომ მათ აღმოაჩინეს და გააუქმეს მმართველ პარტიასთან დაკავშირებული ათეულობით ყალბი ფეისბუკ გვერდი და ანგარიში, რომლებიც მოქმედებდნენ კოორდინებულად ოპოზიციური ჯგუფებისა და ოპოზიციური განწყობების წინააღმდეგ და აღვივებდნენ ანტიდასავლურ და რაც განსაკუთრებით მნიშვნელოვანია ანტი-ამერიკულ განწყობებს.

ამ შემაშფოთებელი ტენდენციების მიმართებით, შეერთებული შტატების პრეზიდენტმა ხელი მოაწერა აშშ-ის კონგრესის 2019 და 2020 წლებისთვის თანხის გამოყოფის ორ საკანონმდებლო აქტს, რაც კონკრეტულად ეხებოდა საქართველოს მთავრობის მხრიდან დემოკრატიული ფასეულობების, თავისუფალი ბაზრის პრინციპების და ამერიკული ბიზნესის ინტერესების წინააღმდეგ შეშფოთებას. პირველად საქართველოს თანამედროვე ისტორიაში, აშშ-ს მთავრობიდან თანხის გამოყოფის შესახებ კანონმდებლობის გათვალისწინებით, თქვენს ქვეყანას უარყოფითად და სიფრთხილით უყურებენ.

განხილული ნეგატიური მოვლენებისა და ყოველწლიური ფინანსური დახმარების ფონზე, აშშ-ში გახშირდა მოწოდებები სანქციებისა და სხვა შესაძლო სადამსჯელო მოქმედებების შესახებ. მე ვუერთდები მზარდი კონგრესმენების რიცხვს, რომლებიც თავიანთი უშუალო ჩართულობით მოითხოვენ აშშ-საქართველოს სამართლიანი ბიზნესის შესახებ სპეციალური აქტის რეფორმირებას.

საქართველო რჩება აშშ-ს მნიშვნელოვან მეგობრად და სტრატეგიულ პარტნიორად. ვიმედოვნებ, რომ მეგობრებს შორის გულწრფელი კომუნიკაცია მომავალი წლებში უფრო მყარი და ძლიერი ურთიერთობის წინაპირობა იქნება. ამავე კონტექსტში, მე ვიმედოვნებ, რომ საქართველოს მთავრობა ხელს აიღებს ამერიკული კომპანიებს საწინააღმდეგო ქმედებებზე და ხელს შეუწყობს აშშ-იდან პირდაპირი ინვესტიციების ზრდას. იმედია, რომ საქართველოს მთავრობა საბოლოოდ, იპოვის გზას გასცეს სწორი პასუხი ქმედებებს, რომელიც წარმოადგენს საფრთხეს ქართველი ხალხი თავისუფლებისა და ეკონომიკური კეთილდღეობისთვის”, – წერია წერილში.

—

პროპორციულ საარჩევნო სისტემაზე გადასვლის ჩაგდების შემდეგ პირველი წერილი გიორგი გახარიამ კონგრესში საქართველოს მეგობართა ჯგუფის ხელმძღვანელების, ადამ კინზინგერისა და ჯერი კონოლისგან, მიიღო. წერილში კონგრესმენები იმედს გამოთქვამდნენ, რომ ხელისუფლება დაუყონებლივ მიიღებდა პროპორციულ საარჩევნო სისტემას.

19 იანვარს გახარიას წერილით მიმართა რესპუბლიკელმა კონგრესმენმა, მარკუეინ მალინმა, და მთავრობას მოუწოდა, შეწყდეს მტრული დამოკიდებულება ამერიკული კომპანიების მიმართ. მალინი წერილში წერდა, რომ ის შეშფოთებულია საქართველოს დემოკრატიული ღირებულებებისგან განგრძობადი გადახვევითა და ეკონომიკური გაუარესებით. ამ წერილით კონგრესმენი მისი კოლეგების, კინზინგერისა და კონოლის, კრიტიკულ წერილს შეუერთდა.

მალინის წერილს მალევე, 21 იანვარს კიდევ ერთი წერილი დაემატა, რომელსაც ხელს აწერდნენ რესპუბლიკელი და დემოკრატი კონგრესმენები, ადამ კინზინგერი, ჯერი კონოლი, ელიოტ ენგელი და მაიკლ მაკკაული. წერილში კონგრესმენები შეშფოთებას გამოთქვამდნენ დემოკრატიული რეფორმის ჩაგდებისა და თანმხლები ძალადობის გამო მშვიდობიანი დემონსტრანტების წინააღმდეგ.

კონგრესმენების განცხადებით, ასევე საგანგაშოა ანაკლიის ღრმაწყლოვანი პორტის პროექტის პოლიტიზირებაც. წერილში აღნიშნული იყო, რომ ისინი შეწუხებულები არიან პროკურატურის მიერ ქართული ოცნების ოპონენტების წინააღმდეგ დაწყებული, თუ განახლებული საქმეებით.

25 იანვარს ენმ-მ გახარიას მიმართ მიწერილი კიდევ ერთი წერილი გაასაჯაროვა, რომელიც 19 დეკემბრითაა დათარიღებული. წერილის ავტორი ამჯერად ჰელსინკის კომისიის სენატორი როჯერ ვიკერი იყო.

წერილში ნათქვამია, რომ ხელისუფლებამ უნდა მიიღოს მისაღები საარჩევნო სისტემა, რომელიც უზრუნველყოფს თამაში თანაბარ წესებს ყველასთვის, წინააღმდეგ შემთხვევაში – არჩევნების ლეგიტიმაცია შემცირდება.

ტეხასელმა კონგრესმენმა პიტერ ოლსონს მართალია გახარიასთვის წერილი არ მიუწერია, თუმცა Twitter-ის ოფიციალურ გვერდზე დაწერა, რომ „ქართველი ხალხი კორუმპირებულ მთავრობაზე უკეთესს იმსახურებს“.

28 იანვარს კი კონგრესში სიტყვით გამოსვლის დროს ოლსონმა ბიძინა ივანიშვილი ამერიკული სატელევიზიო შოუს პერსონაჟს გრაუჩი ოსკარს შეადარა და მას ვლადიმერ პუტინის მარიონეტი უწოდა.