ზუგდიდში ე.წ. ფრანგულ პარკში თოვლმა საბავშვო ატრაქციონის სახურავი დააზიანა. სავარაუდოდ დაზიანება რამდენიმე დღის წინ მოხდა, თუმცა ამ საკითხთან დაკავშირებით ქალაქ ზუგდიდის მერიას ოფიციალური კომენტარი არ გაუკეთებია, „ დიდთოვლობის გამო ფრანგული პარკის მიმდებარე ტერიტორიაზე არსებული საბავშო ატრაქციონის დაზიანებული სახურავის სარეაბილიტაციო სამუშაოები ამ დღეებში დაიწყება.“- ნათქვამია უწყების მიერ „ოდიშინიუსისთვის“ გაკეთებულ განცხადებაში. ამბის გარკვევა „ოდიშინიუსმა“ზუგდიდის მუნიციპალიტეტის კეთილმოწყობის ცენტრის დირექტორთანაც სცადა, თუმცა უშედეგოდ, მამაუკა ციმინტიამ ჩვენს სატელეფონო ზარებს არ უპასუხა.შეგახსენებთ, რომ დადიანისეული სასახლისა და კარის ეკლესიის მიმდებარე ტერიტორიაზე ჰოლანდიური სტილის მწვანე პარკი, სკვერი და საბავშვო ატრაქციონი წინა ხელისუფლების დროს გაკეთდა. ის ზუგდიდელებს მაშინდელმა პრეზიდენტმა მიხეილ სააკაშვილმა აჩუქა.მშენებლობას აწარმოებდა თბილისის ერთ-ერთი სამშენებლო ფირმა ,,ევროცენტრი“. პარკი 2007 წლის 26 მაისს, საქართველოს დამოუკიდებლობის დღეს საზეიმოდ გაიხსნა. მიუხედავად იმისა, რომ ამ წლებში ზუგდიდს არაერთი დიდთოვლობა ახსოვს, ატრაქციონის სახურავი არასდროს ჩანგრეულა. ამ დროისთვის ატრაქციონი არ ფუნქციონირებს, ხოლო ელექტრომანქანებს კი, სახურავიდან ჩამოსული ნალექი აზიანებს.
(მასალისთვის გამოყენებული ფოტო ეკუთვნის რადიო „ათინათს“)