ქუთაისიდან ბათუმის მიმართულებით მიმავალ სამგზავრო მატარებელს სოფელ ხაჯალიასთან ცეცხლი გაუჩნდა.
როგორც საქართველოს რკინიგზის პრესსამსახურში განუცხადეს, მომხდარის შედეგად, არავინ დაშავებულა. მატარებლიდან მგზავრების ევაკუაცია განხორციელდა და ისინი ავტოტრანსპორტით უკვე გაამგზავრეს დანიშნულების ადგილზე.
ადგილზე მობილიზებულია სახანძრო-სამაშველო, სასწრაფო დახმარებისა და პოლიციის ეკიპაჟები. ცეცხლი უკვე ჩამქრალია
მცირე ხნის წინათ ”საქართველოს რკინიგზამ” ქუთაისი-ბათუმის მიმართულებით მოძრავ მატარებელში გაჩენილ ცეცხლთან დაკავშირებით განცხადება გაავრცელა.
რკინიგზის ადმინსტრაციაში განმარტავენ, რომ ქუთაისი-ბათუმის მიმართულებით მოძრავ ელექტრომატარებელ N 682-ზე მოხდა აალება.
”ოპერატიულად განხორციელდა მგზავრების ევაკუაცია. ინციდენტის შედეგად არავინ დაშავებულა. მომხდარს ხელი არ შეუშლია მატარებლების მოძრაობის გრაფიკზე. მოძრაობა აღდგენილია, მიმდინარეობს მოკვლევა და უახლოეს პერიოდში გაირკვევა აალების მიზეზები”, – აცხადებენ რკინიგზაში.