სასწავლო დაწესებულებებში ხვალიდან სტანდარტული პროტოკოლი ამოქმედება, თუ ბავშვების არდასწრება 40%-ზე მეტი იქნება, დაწესებულება სამი დღით დაიკეტება – ამის შესახებ დავით სერგეენკომ ჯანდაცვის სამინისტროში დღეს გამართულ  სპეციალური ბრიფინგზე განაცხადა. ბრიფინგი გრიპის ვირუსის გავრცელებასა და ეპიდემიოლოგიური ვითარებას მიეძღვნა.

მინისტრის განცხადებით, ეს არ არის ეპიდემია, მას თავისი მახასიათებელი აქვს, 500-ზე მეტი დაავადებულია 100 ათას მოსახლეზე, ახლა კი 254 ფიქსირდება. თუმცა იმის გამო, რომ მიმართვიანობა სასწრაფო დახმარების სამსხურებში გაიზარდა, პროტოკოლი ამოქმედდება. 

დავით სერგეენკის თქმით, გუშინ სასწრაფო დახმარების 550 გამოძახება დაფიქსირდა, რომელზე რეაგირებაც ვერ მოხერხდა, ჯანდაცვის სამინისტრომ მიიღო გადაწყვეტილება, რომ პროტოკოლი გააქტიუროს. 

სერგეენკოს თქმით, დღესვე ახალი სადისპეტჩერო შეიქმნება, სადაც გრიპის ჩივილების მქონე გამოძახებები გადამისამართდება და ამ დაავადებების მართვას ოჯახის ექიმები განახორციელებენ. სერგეენკოს თქმით, ასევე გაიხსნება დამატებითი საოჯახო ცენტრები.

ჯანდაცვის მინისტრმა მოსახლეობას მიმართა, რომ გრიპის სიმპტომებისას სასწრაფოს ნაცვლად, ოჯახის ექიმს მიმართონ.