საქართველოს პრეზიდენტი გიორგი მარგველაშვილი სტამბოლში მომხდარი ორი აფეთქების გამო ღრმა მწუხარებას გამოთქვამს და გარდაცვლილთა ოჯახებს უსამძიმრებს.
”საქართველო მტკიცედ გმობს ძალადობის ასეთ სასტიკ გამოვლინებას და კვლავ განაგრძობს ტერორიზმის წინააღმდეგ ბრძოლას. თანადგომას ვუცხადებთ გარდაცვლილთა ოჯახებს და დაშავებულებს სწრაფ გამოჯანმრთელებას ვუსურვებთ”, – ნათქვამია გიორგი მარგველაშვილის განცხადებაში.
სტამბოლში გუშინ განხორციელებული ორმაგი ტერაქტის შედეგად გარდაცვლილთა რაოდენობა 38-მდე გაიზარდა. დაღუპულთა შორის 30 სამართალდამცავია. მომხდარისათვის პასუხისმგებლობა ქურთების დაჯგუფება ,,თავისუფლების ქორებმა'' აიღეს. ვებ გვერდზე გამოქვეყნებულ განცხადებაში მათ აღიარეს თავდასხმის განხორციელება და დაადასტურეს, რომ მათი 2 მებრძოლიც დაიღუპა. დაჯგუფება ქურთების მუშათა პარტიას რამდენიმე წლის წინ გამოეყო და დამოუკიდებელ ჯგუფს წარმოადგენს.
თურქეთში მომხდარი ტერაქტის გამო გლოვაა გამოცხადებული. სტამბოლის მოსახლეობა ტერორისტულ აქტს გმობს და აცხადებს, რომ ტერორისტები მიზანს ვერ მიაღწეევენ.