დღეს ბრიუსელში ნატოს საგარეო საქმეთა მინისტერიალი იწყება. ორდღიანი შეხვედრებისას საუბარი ნატო-ევროკავშირის ურთიერთობებზე, ავღანეთის მტკიცე მხარდაჭერის მისიაზე, ასევე რუსეთსა და უკრაინაზე იქნება.
ბრიუსელში იმყოფება საქართველოს საგარეო საქმეთა მინისტრი მიხეილ ჯანელიძე, რომელიც ავღანეთის მტკიცე მხარდაჭერის მისიასთან დაკავშირებულ შეხვედრებში მიიღებს მონაწილეობას.
დაგეგმილია მისი ორმხრივი შეხვედრებიც კოლეგა მინისტრებთან , აგრეთვე ნატოს გენერალური მდივნის ახალ მოადგილესთან როუზ გოტემოლერთან. შეხვედრისას აქცენტი გაკეთდება საქართველოს ალიანსში ინტეგრაციაზე და ნატოს სამხედრო კომიტეტის ვიზიტზე თბილისში, რომელიც მომავალი წლის დასაწყისში უნდა შედგეს.
„ჩვენ ყურადღებას გავამახვილებთ ალიანსთან პრაქტიკული თანამშრომლობის საკითხებზე, ორმხრივ შეხვედრებს გავმართავთ ალიანსის წევრი სახელმწიფოების საგარეო საქმეთა მინისტრებთან, სადაც განხილვის მთავარი თემა იქნება საქართველოს ევროატლანტიკური ინტეგრაციის პროცესი და განსაკუთრებით ვარშავაში მიღებული გადაწყვეტილებების განხორციელების მიმდინარეობა,“ – განაცხადა საქართველოს მუდმივმა წარმომადგენელმა ჩრდილოატლანტიკურ ალიანსში ალექსანდრე მაისურაძემ.