ზუგდიდის მერიაში უარყოფენ ინფორმაციას იმის შესახებ, რომ რამდენიმე დღის წინ, თბილისში, რუსთაველის გამზირზე დაინსტალირებული ზვიგენების გამოსახულების მქონე ე.წ. ბატუტი ზუგდიდში, დადიანების პარკის მიმდებარედაა განთავსებული. ფოტოები სოციალურ ქსელში მოქალაქე მარიამ სიჭინავამ გამოაქვეყნა.

“წელს, ზუგდიდის მუნიციპალიტეტი ახალ წელს განსაკუთრებულად დახვდა, სადღესასწაულო დღეები ძალიან დატვირთული იყო სხვადასხვა ღონისძიებით. ბავშვებისთვის საინტერესო და გასართობი რომ ყოფილიყო სხვადასხვა ლოკაცია, განთავსდა გასაბერი კონსტრუქცია, სახტუნაო ბატუტი და კარუსელები. სხვადსხვა დღესასწაულებზე და ღონისძიებებზე ყოველთვის გათვალისწინებულია საბავშვო სივრცეების მოწყობა, შესაბამისად ხაზგასმით შეგვიძლია გითხრათ, რომ კონსტრუქცია, რომელზეც მოქალაქემ გაავრცელა ინფორმაცია, თითქოს ის თბილისიდანაა ჩამოტანილი, სიმართლეს არ შეესაბამება. აღნიშნული გასაბერი საბავშვო ბატუტი და სასრიალო კონსტრუქცია ნაძვის ხესთან 25 დეკემბრიდანაა განთავსებული და 7 იანვრის ჩათვლით პატარებს სასიამოვნო გასართობ განწყობას შეუქმნის. “- აცხადებენ მერიაში. უწყების ინფორმაციით, გასაბერი კონსტრუქცია, რომელზეც მარიამ სიჭინავა წერს, ზუგდიდში არაერთ ღონისძიებაზე იყო გამოტანილი, მათ შორის, 26 მაისს, საბავშვო სივრცეში და ღვინის ფესტივალზეც.