ცეცხლსასროლი იარაღის უკანონო შეძენა-შენახვა ტარების ბრალდებით დააკავებული გიორგი რურუას სასამართლო პროცესზე ხმაურია.
მოსამართლე ნინო ჩახნაშვილის გადაწყვეტილებით, დარბაზში წესრიგის დაცვის მიზნით სხდომა დაიხურა. აღნიშნულს დარბაზში მყოფთა მხრიდან სტვენა და ხმაური მოჰყვა.
„მონა ხარ!”, „ბიძინას მონა ხარ”, – ამ სიტყვებით მიმართავენ დარბაზში მყოფები მოსამართლეს.
გიორგი რურუას ახლობლები და მეგობრები აცხადებენ, რომ ისინი დარბაზს არ დატოვებენ.
ერთიანი ნაციონალური მოძრაობის” წევრის, თინა ბოკუჩავას თქმით, ერთადერთი მიზეზი, რის გამოც გიორგი რურუა იმყოფება პატიმრობაში, არის ის, რომ ის ძალიან აქტიურად უჭერდა მხარს საოკუპაციო მოძრაობას და ანტისაოკუპაციო აქციებს.
მისივე თქმით, რურუა ივანიშვილის პირადი პატიმარია.
“გუშინდელი შედეგები კიდევ ერთხელ ადასტურებს, რომ ერთადერთი მიზეზი, რის გამოც გიორგი რურუა იმყოფება პატიმრობაში, არის ის, რომ ის ძალიან აქტიურად უჭერდა მხარს საოკუპაციო მოძრაობას და ანტისაოკუპაციო აქციებს. ასევე, მან გადამწყვეტ მომენტში ფინანსური დახმარება გაუწია ქვეყნის მთავარ ოპოზიციურ არხს „მთავარს“. ეს არის ორადორი მიზეზი, რის გამოც გიორგი რურუა დღეს იმყოფება პატიმრობაში. ის არის ივანიშვილის პირადი პატიმარი, რომელიც ამბობს, რომ ასეთი აქტივიზმი და ოპოზიციური ტელევიზიის მხარდაჭერა ისჯება ჩვენს ქვეყანაში” – აღნიშნა ბოკუჩავამ.
პროკურატურის ინფორმაციით, გიორგი რურუას ბრალდებას დაემატა ახალი მუხლი, რომელიც სასამართლო გადაწყვეტილების შეუსრულებლობასა და მისი შესრულებისათვის ხელის შეშლას გულისხმობს.