ნოდარ ხადური, თეა წულუკიანი და თამარ ბერუჩაშვილი – აღნიშნულ მინისტრებს მალე თანამდებობის დატოვება მოუწევთ. აღნიშნულ ინფორმაციას გამოცემა "ალია" ავრცელებს. გაზეთის ინფორმაციით, 2016 წლის თებერვალში, ეროვნული ბანკის პრეზიდენტის გიორგი ქადაგიძის თანამდებობას ეკონომიკისა და მდგრადი განვითარების მინისტრი, ვიცე პრემიერი გიორგი კვირიკაშვილი დაიკავებს. გამოცემის ინფორმაციით, საპარლამენტო უმრავლესობის ლიდერის პოზიზიის დატოვებას აპირებს დავით საგანელიძე, რომელიც სავარაუდოდ, საპარტნიორო ფონდის აღმასრულებელ დირექტორად დაინიშნება. საპარლამენტო უმრავლესობის ლიდერად გია ვოლსკი მოიაზრება. გამოცემა წერს, რომ პარლამენტის საგარეო ურთიერთობათა კომიტეტის თავმჯდომარე ზვიად კვაჭანტირაძე აღნიშნულიდან მთის მინისტრის პოსტზე გადაინაცვლებს. როგორც კულუარებში ამბობენ, მას ამის სურვილი აქვს. გამოცემის წყაროს ცნობით, თანამდებობებს დატოვებენ იუსტიციის მინისტრი თეა წულუკიანი და სოფლის მეურნეობის მინისტრი ოთარ დანელია.
აღნიშნულ ინფორმაციას მედიასთან კომენტირებისას არ ადასტურებს სოფლის მეურნეობის მინისტრი. ოთარ დანელია დაგეგმილ სამთავრობო ცვლილებებზე ინფორმაციას არ ფლობს. „უკვე მერამდენე ინფორმაციაა. არაფერი არ ვიცი ამის შესახებ“ – განუცხადა ჟურნალისტებს ოთარ დამელიამ. მინისტრის თქმით, პრემიერ-მინისტრთან ამ თემაზე საუბარი არ ყოფილა.
ავტორი: ლევან კალანდია