26 დეკემბერს, ტელეკომპანია „ოდიშის“ პირდაპირ ეთერში, გადაცემა „რეალობის“ სტუმარმა, ინტერნეტგამოცემა ლაივპრესის ჟურნალისტმა ნინო თოლორაიამ მედიის თავისუფლების შეზღუდვასთან დაკავშირებით ისაუბრა და კონკრეტული მაგალითი მოიყვანა. ჟურნალისტის თქმით, ამ მხრივ, პრობლემა არსებობდა ადრეც და არსებობს ახლაც.
“დღესაც ადგილობრივი ხელისუფლების წარმომადგენლებშიც არიან ადამიანები, რომლებსაც აქვთ გარკვეული აგრესია ჩვენი მედიასაშუალების მიმართ. ჰგონიათ, რომ მათდამი კრიტიკა და ჩვენს მიერ გაშუქებული მასალები მათ პოლიტიკურ მოსაზრებას უნდა ემთხვეოდეს, წინააღმდეგ შემთხვევაში ძალიან მარტივად ხდება პარტიული „იარლიყის“ მიკერება. ეს არის ძალიან ცუდი ტენდენცია. შემიძლია გავიხსენო გუშინდელი ფაქტი მაგალითად, ზუგდიდის მაჟორიტარულ დეპუტატის – მერაბ ქვარაიას ბიუროს კედელზე, კვირის განმავლობაში ხდება სხვადასხვა შინაარსის წარწერების მიწერა. ბუნებრივია ამას ვაშუქებთ არამხოლოდ ჩვენ, არამედ ყველა ადგილობრივი მედია. ამ საკითხთან დაკავშირებით არის გამოძიებაც დაწყებული და ჩვენ ბუნებრივია, ესეც გავაშუქეთ, ასევე ბიუროს პოზიციაც მოვისმინეთ. თუმცა, გუშინ, ბატონმა მერაბ ქვარაიამ ჩვენი სააგენტოს ჟურნალისტს უთხრა, რომ „თქვენ მარტო ამ ფაქტების გაშუქებით ხართ დაკავებული და მეტს არაფერს აკეთებთ?“.
იცით ,მაინც არის დისკომფორტი და ეს ზოგადად არის ირიბი მცდელობა მედიაზე ზეწოლის.
ჩვენ, ბუნებრივია ვართ თავისუფალი მედიის წარმომადგენლები და გავაშუქებთ ნებისმიერ პოლიტიკოს და პარტიას თუ შეეხება მსგავსი პრობლემა იმდენჯერ, რამდენჯერაც ამის საჭიროება დადგება და ვერავისგან თითის ქნევას ნამდვილად ვერ ავიტანთ“- განაცხადა ნინო თოლორაიამ.