“ეჭვი მაქვს, რომ “ნაციონალურ მოძრაობასთან” დაკავშირებულმა 20-კაციანმა ჯგუფმა, რომელიც “მრავალათასიან” აქციებს ატარებს, “ფეისბუქის” ადმინისტრაციას ტვინი წაუღო გვებრძვიან, ვიდევნებით და გვიშველეთო.

შესაძლოა, “ფეისბუქის” ადმინისტრაციაში ნაცნობიც გამონახეს და მიაღწიეს, რომ “ნაცების” მამხილებელი გვერდები დაებლოკათ. დარწმუნებული ვარ, ამ გვერდების დაბლოკვის შემდეგ “ქართული ოცნების” მხარდამჭერები სოციალურ ქსელში ბევრად უფრო აქტიურები გახდებიან და “ნაციონალური მოძრაობის” მხილების გაორმაგებული მონდომებით გააგრძელებენ.” – ,,ტროლების ფაბრიკის დირექტორი” კოკა ყანდიაშვილი გაზეთ ასავალ-დასავალთან ინტერვიუში Facebook-ის მიერ პროსახელისუფლებო, ანტიდასავლური გვერდების წაშლას გამოეხმაურა. 

ახლა ირკვევა ისიც, რომ კოკა ყანდიაშვილმა თურმე ,,არც იცოდა”, რა არის ტროლი და ბოტი.

,, დღეს „ფეისბუქზე“ არის ასეთი სიტუაცია: თუ სააკაშვილის მომხრე არ ხარ, მაშინ შენ გწერენ, რომ ხარ „ტროლი“, – ამბობს იგი „პალიტრანიუსის“ გადაცემა „ნიუსრუმში“

„როცა ტელევიზორში გაცხადდა, რომ კოკა ყანდიაშვილი არის „ტროლების“ ფაბრიკის დირექტორი, უბრალოდ შევეცადე გავრკვეულიყავი, რა არის ეს „ტროლი“ და რა არის „ბოტი“. გავერკვიე ამ ამბავში და ჩემთვის გასაგებია, მაგრამ მთლიანობაში რომ ვთქვათ, რომ ეს პრობლემაა ჩვენს ქვეყანაში, რაღაც სხვანაირად არის და სხვა ქვეყანაში სხვანაირად არის, ასე არ არის. ახალი ტექნოლოგია არის შემოსული და ამ ტექნოლოგიას თავისი დადებითი და უარყოფითი მხარეები აქვს. რა თქმა უნდა, რუსული პროპაგანდა და „ფეიქ ნიუსები“ არის ძალიან საშიში და მე შემიძლია გითხრათ, რომ ყველა პოლიტიკური ძალა, მათ შორის ხელისუფლება, ოპოზიცია, მათ შორის კერძო ბიზნესი, ყველა ძალიან კარგად სარგებლობს ამ საშუალებით, როგორიცაა „ფეიქ ნიუსი“, – განაცხადა ყანდიაშვილმა.

როგორც მან აღნიშნა, ის ყოველთვის შეებრძოლება „ნაციონალური მოძრაობის“ ხელისუფლებაში დაბრუნების საკითხს.

„როგორც გახსოვთ, დაახლოებით მარტი იყო, თვის დასაწყისი, თქვეს ჩვენს რედაქციაზე, რომ ეს ტროლების ქარხანააო. „ფეისბუქმა“ სულ რამდენიმე დღის წინ დაამტკიცა, რომ კოკა ყანდიაშვილი არაფერ კავშირში არ არის ამ ამბავთან და დაასახელა სხვა კომპანია, რომელიც რაღაცით არის დაკავებული. ამის მერე მთელი პოლიტიკური ისტებლიშმენტი იყო, არ ვიცი, აწყობთ ალბათ, ან ჩემი სახელი მოსწონთ. პირადად მე, ვებრძოდი, ვებრძვი და მომავალშიც ყოველთვის შევებრძოლები „ნაციონალური მოძრაობის“ ხელისუფლებაში“ დაბრუნების ამბავს. დღეს „ფეისბუქზე“ არის ასეთი სიტუაცია: თუ არ ხარ სააკაშვილის მომხრე, მაშინ შენ გწერენ, რომ ხარ „ტროლი“. აი, ამის წინააღმდეგი ვარ. ყველა ქვეყანაში, სადაც სოციალური ქსელები არის შესული, პრობლემა დგას იმის, რომ ნებისმიერ მოქალაქეს, ნებისმიერი მდგომარეობის, შეუძლია შევიდეს და რაც უნდა დაწეროს. ჩვენთან სამწუხაროდ, გადანაშაულებენ“, – განაცხადა ყანდიაშვილმა.

ყანდიაშვილის შეფასებით, რუსული პროპაგანდა და „ფეიქ ნიუსები“ ძალიან საშიშია.მისივე თქმით, ხელისუფლება თუ ოპოზიცია, ყველა კარგად სარგებლობს „ფეიქ ნიუსებით“.

მისი თქმით, „ფეისბუქის“ სახელით გავრცელებული ორი ტექსტი არსებობს. ერთი, მისი შეფასებით „ფეისბუქის“ მიერ გავრცლებული ოფიციალური ტექსტია, მეორე კი ოპოზიციის მიერ დაქირავებული „ენჯეოების“.

„ფეისბუქის“ ოფიციალურ ტექსტში არაფერი წერია, ვის წინააღმდეგ მუშაობენ ეს გვერდები, ანტიდასავლური თუ ოპოზიციის წინააღმდეგ და ა.შ, მეორე, ოპოზიციის მიერ დაქირავებული „ენჯეოების“ ტექსტში კი უკვე წერია, რომ ეს არის ანტიდასავლური პროპაგანდა , რომელსაც ეწევა „პანდა“ და ეს არის ოპოზიციის წინააღმდეგ. ამიტომ ორ სხვადასხვა ტექსტზეა საუბარი“, – განაცხადა ყანდიაშვილმა.

შეგახსენებთ, რომ „ფეისბუქმა“ საქართველოს ხელისუფლებასთან დაკავშირებული ასობით გვერდი, ანგარიში და ჯგუფი წაშალა.

„წავშალეთ 39 ქართული „ფეისბუქ“ ანგარიში, 344 გვერდი, 13 ჯგუფი და 22 „ინსტაგრამ“ ანგარიში, რომლებიც ჩართულები იყვნენ კოორდინირებულ არაავთენტურ ქცევაში“,- ამის შესახებ კომპანია „ფეიბუქის“ მიერ გავრცელებულ განცხადებაშია ნათქვამი.