ცოტნე გამსახურდიას ადვოკატი, ამირან გიგუაშვილი ამბობს, რომ დაპირისპირება, რომლის დროსაც გამსახურდია დაჭრეს, ჩვეულებრივი ჩხუბი არ იყო. მისივე თქმით, შემთხვევის ადგილის დათვალიერებიდან იკვეთება, რომ გამსახურდია თავდამსხმელებმა “სასიკვდილოდ გაიმეტეს”.
“ფაქტია, რომ იქ იყო ორთაბრძოლა. იქ არის კვალი დარჩენილი და ამასთან დაკავშირებით მუშაობს საგამოძიებო ორგანოები”,-თქვა ადვოკატმა.
გიგუაშვილი ადასტურებს, რომ ჭრილობები გამსახურდიას ბასრი იარაღით, დანით მიაყენეს, თუმცა, მისივე თქმით, არსებობს ვერსია, რომ დანის გარდა გამოყენებულია სხვა საგანიც.
“ყველა ის პირი, ვისაც შეიძლება ინფორმაცია გააჩნდეს აღნიშნულ საქმესთან დაკავშირებით, გამოიკითხა, ან მიმდინარეობს გამიკითხვა. უახლოეს საათებში ჩემი თანდასწრებით ჩატარდება იმ ოჯახის წევრის გამოკითხვა, რომელიც სახლში იმყოფებოდა”,-თქვა ადვოკატმა.
ცოტნე გამსახურდია გულ-მკერდისა და თავის არეში ჩატარებული ორი მძიმე ოპერაციის შემდეგ რეანიმაციაში, მართვით სუნთქვაზე რჩება და მისი მდგომარეობა კრიტიკულად მძიმეა.
ნეიროქირურგიული ოპერაცია, რომელიც 7 საათზე მეტ ხანს გაგრძელდა და დღეს, 20 დეკემბერს, დილით დასრულდა, ქირურგის განცხადებით, წარმატებული იყო, მაგრამ პაციენტის მდგომარეობა საკმაოდ მძიმეა და შესაძლოა, ცოტნე გამსახურდიას თავსა და გულ-მკერდის არეში კიდევ ჩაუტარდეს ოპერაციები.
შეგახსენებთ, რომ ცოტნე გამსახურდია 19 დეკემბერს, საღამოს გალის ქუჩაზე დაჭრეს, როცა “კოლხური კოშკიდან” გამოდიოდა. პირები, რომლებიც მას თავს დაესხნენ, ჯერ არ არიან დაკავებული. შსს-მ გამოძიება მკვლელობის მცდელობის მუხლით დაიწყო.