„ახალგაზრდა იურისტთა ასოციაციამ“ 20-21 ივნისის მოვლენებზე მომზადებული ანგარიშის პრეზენტაცია გამართა.
როგორც ჟურნალისტებს საია-ს თავმჯდომარე სულხან სალაძემ განუცხადა, 20-21 ივნისის ღამეს მნიშვნელოვან პრობლემას წარმოადგენდა მედიასთან დაკავშირებული საკითხები. მისივე თქმით, ერთ კონკრეტულ აქციაზე დაშავებული მედიის ამდენი წარმომადგენელი, სხვა დროს არ ყოფილა.
ანგარიშის მიხედვით, ადგილი ჰქონდა მედიის წარმომადგენელთა უფლებების, მათ შორის, გამოხატვის თავისუფლების, არასათანადო მოპყრობისგან დაცვის უფლების, საკუთრების უფლების დარღვევის მძიმე შემთხვევებს,ასევე, ჟურნალისტებისთვის პროფესიული საქმიანობის ხელშეშლის ფაქტებს.
როგორც ანგარიშის ერთ-ერთი ავტორი, საია-ს წარმომადგენელი ნონა ქურდოვანიძე ამბობს, კითხვის ნიშნებს ბადებს ის გარემოებაც, რომ არცერთი ჟურნალისტი არ არის ცნობილი დაზარალებულად
„ჟურნალისტების მიმართაც იყო გამოყენებული ძალა, რომლის არც საჭიროება და არც საფუძველი არ არსებობდა. გარდა ამისა, ზოგიერთ ჟურნალისტს შეეშალა საქმიანობის განხორციელებაში ხელი და ერთ-ერთი ჟურნალსიტი იყო თავისუფლებააღკვეთილიც, რაც სერიოზულ კითხვებს ბადებს, რა საჭირო იყო და აუცილებლობა იყო რომ ჟურნალისტი დაეკავებინათ? ჩვენ გვაქვს რეკომენდაცია პროკურატურისთვის, რომ დროულად ჩაატარონ გამოძიება, რადგან არცერთი ჟურანალისტი არ არის დაზარალებულად ცნობილი, რაც ასევე სერიოზულ კითხვებს აჩენს გამოძიების მიუკერძოებლობასთან დაკავშირებითაც,“ – განაცხადა ნონა ქურდოვანიძემ.