ქართულ მედიაში ბოლო დღეები აგორებული ინფორმაცია იმის შესახებ, რომ თურქეთის პრეზიდენტი რეჯეფ თაიფ ერდოღანი ბათუმთან მიმართებით რეფერენდუმს გეგმავს, სინამდვილეს არ შეესაბამება და მისი ნათქვამის ზედმეტად თავისუფალ ინტერპრეტაციას წარმოადგენს.
ლაპარაკია მის გამოსვლაზე ორი დღის წინ რიზეს უნივერსიტეტში სასწავლო წლის გახსნის ცერემონიალზე, სადაც მან ბათუმი და საქართველო ისტორიული წარსულის კონტექსტში ახსენა და მასზე, როგორც მეგობარ ქვეყანაზე, ისაუბრა. სინამდვილეში სირიასა და ერაყში განვითარებულ მოვლენებთან და საზოგადაოდ თურქეთის მეგობარ ქვეყნებთან კონტექსტში მან ახსენა ე.წ. ეროვნული აღქმის (Misak-ı Millî) საზღვრები და ამ საზღვრებში შემავალი ტერიტორიები, მათ შორის ბათუმიც .
"ხშირად გვეკითხებიან, რატომ ინტერესდებით ერაყით, სირიით, საქართველოთი, ყირიმით, ყარაბაღით, აზერბაიჯანით, ბალკანეთით და ჩრდილო აფრიკით? არცერთი ეს ადგილი ჩვენთვის უცხო არაა, რიზეს და ბათუმის ერთმანეთისგან განცალკევება შესაძლებელია? როგორ შეიძლება, ედირნესა და სალონიკზე ცალ-ცალკე ვიფიქროთ? როგორ შეიძლება, ვიფიქროთ, რომ გაზიანთეფსა და ალეპოს, მარდინსა და ჰასაკას, სირიასა და მოსულს ერთმანეთთან კავშირი არ აქვთ? ჰათაიდან მაროკომდე სადაც არ უნდა წახვიდეთ, მთელს ახლო აღმოსავლეთსა და ჩრდილო აფრიკის ქვეყნებში აუცილებლად ნახავთ რაიმეს ჩვენი დანატოვარიდან", – თქვა ერდოღანმა.
ერთია ,,ეროვნული აღქმის საზღვრები'' და და მეორე პოლიტიკა, რომელსაც თურქეთი ამ საზღვრებში შემავალი ტერიტორიების მიმართ ახორციელებს. ამ თვალსაზრისით ლაზეთიც არის და იქნება ქართველი ხალხის ეროვნული აღქმის საზღვრებში, მაგრამ ეს არ ნიშნავს, რომ საქართველოს სახელმწიფო აპირებს აწარმოოს საზღვრების გადახედვისა და ლაზეთის ტერიტორიის შემოერთების პოლიტიკა.