რუსთავის ცენტრალურ საავადმყოფოში 19 წლის გოგონა გარდაიცვალა. არსებული ინფორმაციით, ახალგაზრდას ცხვირის ოპერაცია უნდა გაეკეთებინა, თუმცა ის ოპერაციის დაწყებამდე დაიღუპა.
ოჯახის წევრები მომხდარში ექიმებს ადანაშაულებენ და აცხადებენ, რომ გულის გაჩერება ნარკოზმა გამოიწვია.
რუსთავის ცენტრალურ საავადმყოფოში ადასტურებენ, რომ გოგონას გარდაცვალების მიზეზი გახდა ანაფილაქსიური შოკი, რომელიც ორგანიზმში ნოვოკაინის შეყვანისთანავე განვითარდა.
საავადმყოფოს დირექტორის მოადგილე დავით გოგოძე აცხადებს, რომ ოპერაციის დაწყებამდე პაციენტს მედიკამენტებზე შესაბამისი სინჯი ჩაუტარდა, თუმცა მას ანესთეზიის შეყვანისთანავე განუვითარდა მძიმე ანაფილაქსიური შოკი. რომელიც უბრალო ნოვოკაინის პირველივე წვეთიდანდაიწყო.
ექიმები გოგონას რეანიმირებას 9 საათი ცდილობდნენ, მაგრამ მიუხედავად დიდი მცდელობისა მისი გადარჩენა ვერ მოხერხდა.
,, წინასწარ სინჯი რა თქმა უნდა, გაკეთდა. ოჯახის წევრებმაც იციან, რომ გაკეთდა. სინჯის შედეგებს ვაჩვენებთ ხოლმე ყოველთვის ოჯახის წევრებს. ნახეს თვითონაც, რომ არაფერზე რეაქცია არ ჰქონდა. არ არსებობს გარანტია, რომ შოკი არ განვითარდება. მე ექიმის გადაცდომას ვერ ვხედავ. დიდხანს გაგრძელდა რეანიმაცია, შედეგიც იყო შუალედში, მაგრამ ვეღარ გაუძლო ორგანიზმმა და საბოლოოდ გული გაჩერდა.” – ამბობს დავით გოგოძე .
შსს-ში აცხადებენ, რომ ფაქტზე გამოძიება სსკ-ის 116-ე მუხლითაა დაწყებული, რაც გაუფრთხილებლობით სიცოცხლის მოსპობას გულისხმობს.