ანაკლია ეკოლოგიური საფრთხის წინაშე დგას, საგანგაშო ვითარება საკურორტო ზონაში მას შემდეგ შეიქმნა, რაც ანაკლიის პორტის ტერიტორიაზე მშენებლობისას ქვიშის მასა ამოიღეს, ხოლო სამუშაოები შეჩერდა. ადგილობრივები ამბობენ, რომ გაუსაძლისი მდგომარეობაა მაშინ, როცა ქარია და პრობლემასთან გამკლავება საკუთარი ძალებით უწევთ. მოსახლეობა ონკოლოგიური დაავადებების გავრცელების საშიშროებაზეც საუბრობს და ამბობს, რომ აუცილებლად უნდა აიღოს პასუხისმგებლობა ვინმემ, რადგან ეს არის სრული გულგრილობა და მოსახლეობის გაწირვა სასიკვდილოდ. ძლიერი ქარის გამო ანაკლიაში ტურისტების ნაკლებობაა, დაცარიელებულია სანაპირო ზოლი, განადგურებულია ინფრასტრუქტურა, ქვიშამ მოსახლეობის სახლები დააზიანა. საგრძნობლად გაუარესებულია ხილვადობა, მოსახლეობა ხელისუფლებას უყურადღებობაში ადანაშაულებს. ადგილობრივების თქმით, საკურორტო ზონაში ცხოვრება საშიში და სახიფათო გახდა.