მუნიციპალიტეტების ტერიტორიაზე არსებული ქონების 100% -ით სახელმწიფო მფლობელობაში არსებობა თვითმმართველობების ეკონომიკურ ზრდას აფერხებს, ამის შესახებ „საერთაშორისო გამჭვირვალობა-საქართველოს“ კვლევაშია აღნიშნული. უწყებაში განმარტავენ, რომ სახელმწიფომ ვალდებულება არ შეასრულა და ვადებიც გასულია.

“ადგილობრივი თვითმმართველობის კოდექსის 162-ე მუხლის თანახმად, საქართველოს იუსტიციის, რეგიონული განვითარებისა და ინფრასტრუქტურის, ეკონომიკისა და მდგრადი განვითარებისა და ფინანსთა სამინისტროებს 2017 წლის 1- ელ იანვრამდე უნდა შეემუშავებინათ მუნიციპალიტეტებისთვის სასოფლო-სამეურნეო დანიშნულების მიწების გადაცემის ვადების ამსახველი შესაბამისი გრაფიკი და წესი, დასამტკიცებლად კი საქართველოს მთავრობისთვის წარედგინათ, თუმცა აღნიშნული ვალდებულება სამინისტროებს დღემდე არ შეუსრულებიათ”- განაცხადა „საერთაშორისო გამჭვირვალობა – საქართველოს“ ზუგდიდის ოფისის რეგიონულმა კოორდინატორმა არჩილ თოდუამ.

არასამთავრობო ორგანიზაციაში განმარტავენ, რომ პრობლემებია დაცულ ტერიტორიებთან დაკავშირებითაც, 87 დაცული ტერიტორიიდან შემოსული თანხის 100% მთლიანად ცენტარლურ ხელისუფლებაში მიდის და ადგილობრივ მუნიციპალიტეტებს არაფერი რჩებათ.„საერთაშორისო გამჭვირვალობა-საქართველოს“ რეკომენდაციით, საქართველოს მთავრობამ  დროულად უნდა დაიწყოს მუნიციპალიტეტებისთვის სასოფლო-სამეურნეო დანიშნულების მიწისა და სხვა ქონების გადაცემის პროცესი, რაც საშუალებას მისცემს თვითმმართველობებს, გაზარდონ საკუთარი შემოსავლები და გააუმჯობესონ მუნიციპალური სერვისების ხარისხი.