გუშინ დილიდან ტობა- ვარჩხილის მიდამოებში 33 წლის ქართველ ტურისტს გიორგი მუჩიაშვილს ეძებენ . მეგობრების თქმით, ტურისტული მარშრუტის ერთ-ერთი პუნქტის გავლის შემდეგ მან გზის გაგრძელება აღარ ისურვა და დაღლილობის გამო გადაწყვიტა ტბის პირას დალოდებოდა სხვებს, რომელთაც ზედა ზონაში მდებარე მეორე ტბისკენ განაგრძეს გზა.
უკან დაბრუნებულ მეგობრებს გიორგი მუჩიაშვილი დათქმულ ადგილზე აღარ დახვდა. როგორც ირკვევა, იგი არც მოლაშქრეთა კარავში დაბრუნებულა. ძალადობის ან სხვა სახის ხიფათის მიმანიშნებელი რაიმე კვალი არ ჩანს. ახალგაზრდას თან ჰქონდა ზურგჩანთა მცირედი საგზლითა და აუცილებელი ნივთებით, ამიტომ ვარაუდობენ, რომ შესაძლოა გზის გაგრძელება გადაწყვიტა და საუკეთესო შემთხვევაში გზა აებნა – თუმცა ორი დღის უშედეგო ძებნა საკმაოდ სერიოზული მიზეზია მღელვარებისთვის.