ეროვნული ბანკი მიესალმება პრეზიდენტის მიერ ვეტოს დადებას ეროვნული ბანკიდან ზედამხედველობის სამსახურის გამოყოფის კანონპროექტზე, რომელსაც ექსპერტები არაკონსტიტუციურად და ასოცირების შეთანხმების დღის წესრიგის დარღვევად მიიჩნევენ. .
ეროვნული ბანკის პრეზიდენტი გიორგი ქადაგიძე დღეს გაკეთებულ განცხადებაში აღნიშნავს, რომ "ეს კანონპროექტი დიდი საფრთხეს შეიცავს და ვერ უძლებს ვერანაირ კრიტიკას, მათ შორის სამართლებრივი ტექნიკის თვალსაზრისითაც.''
ქადაგიძის განმარტებით, კანონი ეწინააღმდეგება კონსტიტუციას, ასოცირების დღის წესრიგს, ასევე ყველა რეკომენდაციას, რომელსაც იძლევიან საერთაშორისო პარტნიორები – არცერთი მნიშვნელოვანი შენიშვნა ამ კანონთან დაკავშირებით გათვალისწინებული არ არის.
,,კანონპროექტის ერთადერთი მიზანია ეროვნული ბანკის გახლეჩა, ასევე საქართველოს პრეზიდენტის როლის, როგორც კონსტიტუციის და ძალთა ბალანსის გარანტის, შემცირება," – აცხადებს გიორგი ქადაგიძე.
სხვაგვარად ფიქრობენ მმართველი გუნდის წარმომადგენლები. ეკონომიკის მინისტრის გიორგი კვირიკაშვილის საპასუხო განცხადებით, კანონი მიღებულია საერთაშორისო სტანდარტების შესაბამისად, ,,მე არ ვიზიარებ სპეკულაციებს, რომელიც ამ პროცესის შეჩერებას ისახავს მიზნად," – განაცხადა მან.
.