ჩხოროწყუში მინერალური წყლის „ლუგელას" ჩამომსხმელი ქარხანა აშენდება. ამ დროისთვის კომპანია მშენებლობის ნებართვას ელოდება – ნებართვის მიღების სემთხვევაში სამშენებლო სამუშაოები მიმდინარე წელს დაიწყება და დაახლოებით 6 თვეში დასრულდება. ჩხოროწყუს მუნიციპალიტეტის გამგებელი დავით გოგუა აცხადებს, რომ პროექტის მიხედვით დაგეგმილია წყლის ჩამოსხმა და მისი ექსპორტზე გატანა.

საწყის ეტაპზე დაგეგმილია 2.5 მილიონი დოლარის ინვესტირება. აქედან 80 პროცენტი რუსეთის ფედერაციის მოქალაქის – ინგუში ბიზნესმენის საკუთრებაა, 20 პროცენტი კი ქართველი ბიზნესმენი გეგი გუჯეჯიანისა. 

სამედიცინო გამოკვლევებით დადგენილია, რომ  წყალი „ლუგელა" მიეკუთვნება სამკურნალო-სასმელი წყლების კატეგორიას, რომლის  სამკურნალო ჩვენებებია ტუბერკულოზი, ლულოვანი ძვლების მოტეხილობა, რაქიტი, ალერგიული დაავადებები, სისხლის შედედების დაქვეითება და სხვა.

რაც შეეხება კურორტ ლუგელას,  რომელიც  სოფელ მუხურში მდებარეობს, წლდევანდელ სეზონს სიახლეების გარეშე შეხვდა , გამგებლის თქმით ახლა აქ   მხოლოდ საოჯახო სასტუმროებია, მაგრამ მომავალ წელს და ნაწილობრივ წლეულსაც დაგეგმილია კოტეჯების მშენებლობა.