დღეს, ასოციაცია „იმედი- დევნილ ქალთა მოძრაობა მშვიდობისათვის“ მიერ მრგვალი მაგიდა გაიმართა, სადაც მოწვეულმა სტუმრებმა ბოლო პერიოდში აფხაზეთში განვითარებულ მოვლენებზე ისაუბრეს და იმ მთავარ მესიჯებზე გაამახვილეს ყურადღება, რაც კონფლიქტის მშვიდობიანი გზით მოგვარებას უწყობს ხელს. ასოციაცია „იმედი“-ს ხელმღვანელმა, ქრისტინე კილანავამ განმარტა, რომ მსგავსი ფორმატის შეხვედრების ჩატარება აუცილებელია, რადგანაც ყოველ შეხვედრაზე ბევრი ახალი ინიციატივა იკვეთება, კერძოდ, მათი მხრიდან აფხაზეთიდან გადმოტანილი ნივთების გამოფენა იგეგმება. აფხაზეთის განათლებისა და კულტურის მინისტრის მრჩეველი რამინ საჯაია ამბობს, რომ ქართულ-აფხაზური კონფლიქტი სამწუხაროდ ერთ ადგილას არის გაყინული. მისი თქმით, კონფლიქტის მოგვარების მიზნით უფრო მეტია გასაკეთებელი. შეხვედრას ძირითადად ამ კუთხით მომუშავე არასამთავრობო ორგანიზაციების, აფხაზეთის მთავრობის, ადგილობრივი ხელისუფლების წარმომადგენლები და აფხაზეთიდან დევნილები ესწრებოდნენ.